كۆمه‌ڵێك له كرێكارانی مه‌نته‌قه ئازادی به‌نده‌ر ماه‌شه‌هر، سه‌رله به‌یانی ڕۆژی دووشه‌ممه بۆ جارێكی دیكه، له ناڕه‌زایه‌تیی به په‌رداخت نه‌كرانی حه‌قده‌ست و مه‌زایاكانیان و هه‌روه‌ها به‌كرده‌وه ده‌رنه‌هاتنی گه‌ڵاڵه‌ی ڕیزبه‌ندی كاره سه‌خت و زیانباره‌كان، ده‌ستیاندایه كۆبوونه‌وه.
به‌وته‌ی كرێكارانی ناڕازیی، سه‌ره‌ڕای به‌ڕێوه‌چوونی چه‌ندین كۆبوونه‌وه له كۆمیسیۆنی كرێكاری شارستانی به‌نده‌ر ماه‌شه‌هر و په‌سه‌ندكردنی چه‌ندین گه‌ڵاڵه، به‌ڵام هه‌تا ئێستا هیچ هه‌نگاوێكی كرداری به ئاڕاسته‌ی چاره‌سه‌ركردنی كێشه‌وگرفته‌كانیان هه‌ڵنه‌گیراوه. كرێكارانی ناڕازیی وێڕای ئاماژه به تواناییه‌كانی ئابووری شارستانی به‌نده‌ر ماه‌شه‌هر و به‌نده‌ر خومه‌ینی له ئۆستانی خوزستان، ده‌ڵێن: به سه‌رنج دان به‌وه‌یكه ئه‌م دوو مه‌نته‌قه‌یه له بواری سه‌نعه‌ت و بازه‌رگاری زۆر هه‌ستیار و ستڕاتێژیكه، به‌ڵام كرێكاره‌كانی له بارودۆخێكی زۆر دژواردا به‌سه‌ر ده‌به‌ن.