ڕۆژی هه‌ینی به‌دوای كوژرانی هاووڵاتییه‌كی ٣١ ساڵ ته‌مه‌ن له بێلارووس به ده‌ستی هێزه ئه‌مه‌نییه‌كان، به ده‌یان هه‌زار كه‌س له خه‌ڵكی ئه‌م وڵاته هاتنه سه‌ر شه‌قامه‌كان و وێڕای به‌شداری كردن له ئه‌سپه‌رده‌كردنی ته‌رمی ئه‌م گه‌نجه، له‌دژی ده‌وڵه‌تی “ئه‌لێكساندێر لۆكاشێنكۆ” خۆپیشاندانیان ئه‌نجام دا.
به‌وته‌ی شایه‌ت حاڵان، هێزه‌كانی لیباس شه‌خسی ڕۆژی چوارشه‌ممه ٢١ی گه‌ڵارێزان، به‌دوای تێكهه‌ڵچوون له‌گه‌ڵ گرووپێكی ناڕازیی له یه‌كێك له مه‌یدانه‌كانی شاری مینسك “ڕامان باندارێنكا”یان له خۆیان بردووه. ده‌شڵێن: دوای كاتژمێرێك ناوبراو به‌هۆی ئه‌شكه‌نجه‌وه له نه‌خۆشخانه گیانی له‌ده‌ستداوه. جێگه‌ی ئاماژه‌یه، له ڕێكه‌وتی ٩ی مانگی ئووت كه ئاكامی هه‌ڵبژاردنه‌كانی سه‌رۆك كۆماری بێلارووس ڕاگه‌یه‌ندرا، به هه‌زاران كه‌س له خه‌ڵكی بێلارووس له‌دژی ئه‌نجام دانی ته‌زوێر له هه‌ڵبژاردنه‌كان هاتوونه‌ته سه‌ر شه‌قام و له‌دژی ده‌وڵه‌ت خۆپیشاندانیان ئه‌نجام داوه. شایانی باسه، له ئه‌نجامی ناڕه‌زایه‌تییه‌كانی سێ مانگی ڕابردوو له بێلارووس، چه‌ندین كه‌س له نه‌یارانی ده‌وڵه‌ت گیانیان له‌ده‌ستداوه و به هه‌زاران كه‌سیش ده‌ستبه‌سه‌ر كراون.