به پێی ڕاپۆرتی ڕێكخراوی مافی مرۆڤی هەنگاو، ڕۆژی دووشه‌ممه ١٩ی گه‌ڵارێزان چوار هاووڵاتیی به ناوه‌كانی “لوقمان و نێدا پیرخزرانیان”، “ئه‌ندیشه سه‌دری” و “ئهیلوار قولیوه‌ند”، دوای زیاتر له مانگێك به‌سه‌ر ده‌ستبه‌سه‌ركرانیان، به قه‌راری وه‌سیقه له زیندان ئازاد كران.
بەپێی ئه‌م ڕاپۆرته، دوای تێپەڕینی زیاتر لە مانگێک لە دەستبەسەر کرانی “لوقمان پیرخزرانیان” و کچەکەی بە ناوی “نێدا پیرخزرانیان”، ڕۆژی دووشەممە بە دانانی وه‌سیقه و بە شێوەی کاتی هەتا بەڕێوەچوونی دانیشتنی دادگاكه‌یان، ئازاد کران. جێگه‌ی ئاماژه‌یه، ڕۆژی سێشەممە ١٥ی ڕەزبەر هێزەکانی وەزارەتی ئیتلاعاتی تاران هەڵیانکوتایە سەر ماڵی “لوقمان پیرخزرانیان” و کچەکەیان دەستبەسەر کرد و دوای ناڕەزایەتیی دەربڕینی ناوبراو کە پەیکەرساز و بەندکراوی سیاسی پێشوو بووە، ئەویش دەستبەسەر کراوە. هەمان ڕۆژ چوار هاووڵاتیی دیکە بە ناوەکانی “ئەندیشە سەدری، شەبنەم ئاشوووری، ئارەش جەوهەری و ئەیلوار قولیوەند” له لایه‌ن هێزه‌كانی ڕژیمه‌وه دەستبەسەر کرابوون. له لایه‌كی دیكه‌وه ڕاپۆرته‌كان باس له‌وه ده‌كه‌ن كه ڕۆژی دووشەممە ١٩ی گه‌ڵارێزان، “ئەندیشە سەدری” چالاکی مەدەنی و ده‌رچووی كۆلێژی هۆنه‌ر و “ئهیلوار قولیوه‌ند” دوای نزیکەی ٣٥ ڕۆژ بە دانانی وه‌سیقه و بە شێوەی کاتی لە زیندان ئازاد کراون.