به هه‌زاران كه‌س له نه‌یارانی ئاكامی هه‌ڵبژاردنه‌كانی په‌رله‌مانی له گورجستان، ڕۆژی یه‌كشه‌ممه ١٨ی گه‌ڵارێزان، له شاری ته‌فلیس هاتنه سه‌ر شه‌قامه‌كان و خۆپیشاندانیان ئه‌نجام دا.
به پێی ڕاپۆرته‌كان، پۆلیسی گورجستان به ماشێنی ئاوپاش و گازی فرمێسكڕێژ هێرشی كردووه‌ته سه‌ر ناڕازییان. به پێی ڕاگه‌یاندنی كۆمیسیۆنی هه‌ڵبژاردنه‌كانی ئه‌م وڵاته، پارتی ده‌سه‌ڵاتدار زیاتر له ٤٨ له‌سه‌دی ده‌نگه‌كانی به‌ده‌ست هێناوه و پارتی “بزووتنه‌وه‌ی یه‌كگرتووی نه‌ته‌وه‌یی”ش، زیاتر له ٢٧ له‌سه‌دی ده‌نگه‌كان به‌ده‌ست هێناوه. شایانی باسه، پارتی “بزووتنه‌وه‌ی یه‌كگرتووی نه‌ته‌وه‌یی” له ناڕه‌زایه‌تیی به ئاكامی هه‌ڵبژاردنه‌كان، په‌رله‌مانی ئه‌م وڵاته‌ی ته‌حریم كردووه و خوازیاری به‌ڕێوه‌چوونی سه‌رله‌نوێی هه‌ڵبژاردنه‌كانی په‌رله‌مانی بووه.