ڕاپۆرته‌كان باس له‌وه ده‌كه‌ن كه ڕۆژێك دوای هێرشی داعش بۆ سه‌ر زانكۆی كابۆل كه به‌هۆیه‌وه ٣٥ خوێندكار گیانیان له‌ده‌ستدا، ڕۆژی سێشه‌ممه ١٣ی گه‌ڵارێزان چه‌ندین كۆبوونه‌وه‌ی ناڕه‌زایه‌تیی له شاره‌كانی ئه‌فغانستان به‌ڕێوه‌چوو.
به پێی ئه‌م ڕاپۆرته، له‌ئه‌نجامی ئه‌م كۆبوونه‌وانه خوێندكارانی ناڕازیی له شاره‌كانی كابۆل، پێكیتا، به‌لخ و هێلمه‌ند، له‌ڕێگه‌ی به‌ده‌سته‌وه گرتنی چه‌ندین پلاكاری ئێعتڕازیی، له‌ئاست هێرش بۆ سه‌ر زانكۆی كابۆل ناڕه‌زایه‌تییان ده‌ربڕی و ئه‌م هێرشه‌یان به كرده‌وه‌یه‌كی نائینسانی ناوبردووه و به توندی مه‌حكوومیان كردووه. ناڕازییان ڕایانگه‌یاندووه كه به‌هۆی به‌رده‌وامی شه‌ڕ له‌م وڵاته، برسییه‌تی و هه‌ژاری چه‌ند هێنده بووه و ئه‌م هێرشانه به هیچ شوێنێك ناگات. به پێی سه‌رچاوه‌كانی ده‌وڵه‌تی ئه‌فغانستان، ژماره‌ی قوربانیانی ڕۆژی دووشه‌ممه بۆ سه‌ر زانكۆی كابۆل بۆ ٣٥ كه‌س به‌رزبووه‌ته‌وه و به پێی ڕاپۆرتی هه‌واڵنێریی رووتێرزیش، به‌هۆی ئه‌م هێرشه ٥٠ كه‌سی دیكه‌ش برینداربوون.