ڕاپۆرته‌كان باس له‌وه ده‌كه‌ن كه به‌هۆی وه‌رگه‌ڕانی به‌له‌می په‌ناخوازان له ده‌ریای مانش له باكووری فه‌ڕانسه، چوار په‌ناخواز له‌وانه دوو منداڵی ئێرانی گیانیان له‌ده‌ستدا.
به پێی ڕاپۆرتی هه‌واڵنێریی ڕوویتێرز، ١٥ سه‌رنشینه‌كه‌ی دیكه‌ی ئه‌م به‌له‌مه كه به‌ره‌و بریتانیا ده‌رۆیشت له خه‌نكان ڕزگاریان بووه. شایانی باسه، له سه‌ره‌تای ساڵی ٢٠٢٠وه هه‌تا ئێستا، به هه‌زاران په‌ناخواز له‌ڕێگه‌ی به‌له‌مه‌وه ئه‌م ڕێگا ئاوییه هه‌ستیاره‌یان تێپه‌ڕكردووه تا خۆیان بگه‌یه‌نه خاكی بریتانیا. ئه‌مه له‌كاتێكدایه كه ده‌وڵه‌تی بریتانیا هه‌تا ئێستا چه‌ندین جار سه‌باره‌ت به به‌ستنی ڕێگا ئاوییه‌كان و پێشگرتن به چوونی په‌ناخوازان بۆ ئه‌م وڵاته، هوشداری به ئێمانۆئێل مه‌كرۆن سه‌رۆك كۆماری فه‌ڕانسه داوه.