به پێی ڕاپۆرتی ڕێكخراوی مافی مرۆڤی هەنگاو، حوکمی ئێعدامی هاووڵاتییەکی خەڵکی کرماشان کە بە تۆمەتی “کوشتنی به ئەنقەست” به سێداره مه‌حكووم كرابوو، لە زیندانی ناوەندیی شاری سنە جێبەجێ کرا.
بەپێی ئه‌م ڕاپۆرته، بەرەبەیانی ڕۆژی چوارشەممە ٣٠ی ڕەزبەر حوکمی سێدارەی بەندکراوێکی خەڵکی کرماشان بە ناوی “شارام تەخشا” تەمەن ٣٠ ساڵ لە زیندانی ناوەندیی شاری سنە جێبەجێ کرا. ناوبراو کە بە تۆمەتی کوشتنی به ئەنقەست حوکمی سێدارەی بە سەردا سەپابوو، ڕۆژی یەکشەممە ڕەوانەی ژوووری تاکەکەسیی زیندانی سنە کرابوو. جێگه‌ی وه‌بیرهێنانه‌وه‌یه، “شارام تەخشا” وێڕای براکەی بە ناوی “شاریار تەخشا” سێ ساڵ له‌مه‌وبه‌ر بە تۆمەتی کوشتنی کەسێکی دیكه لە لایەن هێزە ئەمنییەکانەوە دەستبەسەر کرابوو. ناوبراو دواتر لە لایەن دەزگای قه‌زایی ڕژیمه‌وه حوکمی سێدارە و ١٥ ساڵ زیندانی بە سەردا سەپابوو و شاریاری براشی حوکمی ٤٠ ساڵ زیندانی بەسەردا سەپاوه و ئێستا لە زیندانی دێزڵ ئابادی کرماشان ڕاگیراوە.