به پێی ڕاپۆرته‌كان، هه‌زاران كه‌س، ڕۆژی شه‌ممه ٢٦ی مانگی ڕه‌زبه‌ر له به‌یرووت پێته‌ختی لۆبنان، به‌بۆنه‌ی ساڵوه‌گه‌ڕی ناڕه‌زایه‌تییه به‌رینه‌كان دژبه قه‌یرانی ئابووری هاتنه سه‌ر شه‌قام و ده‌ستیان دایه خۆپیشاندان.
به پێی ئه‌م ڕاپۆرته، خۆپیشانده‌ران ته‌ئكیدیان كردووه كه له خواسته‌كانیان، له‌پێناو له‌سه‌ر كارلابردنی میشێل عون، سه‌رۆك كۆماری ئه‌م وڵاته، پاشگه‌ز نابن. ئۆكتۆبری ساڵی ڕابردوو لۆبنان شایه‌دی ده‌ستپێكی ناڕه‌زایه‌تی به‌رین دژبه گه‌نده‌ڵی، باروودۆخی ناله‌باری ئابووری و دابه‌زینی نرخی پاره‌ی ئه‌م وڵاته بوو. به وته‌ی ناڕازیان، كاربه‌ده‌ستانی سیاسیی لۆبنان به‌رپرسی ئه‌و باروودۆخه خراپه‌ن كه له كۆتایی شه‌ڕی ناوخۆه‌وه له ساڵی ١٩٩٠ی زایینی، به‌سه‌ر ئه‌م وڵاته‌دا سه‌پاوه. ته‌قینه‌وه‌ی مه‌رگباری به‌نده‌ری به‌یرووت له ڕۆژی ١٤ی مانگی گه‌لاوێژ، كه تێیدا لانیكه‌م ١٩٠ كه‌س كوژران و به‌شێك له پێته‌ختی ئه‌م وڵاته‌ی وێران كرد، قه‌یرانی لۆبنانی بردووه‌ته قۆناغێكی نوێوه. شایانی باسه، به‌هۆی ئه‌م ته‌قینه‌وه‌یه، سه‌رۆك وه‌زیران و ئه‌ندامانی ده‌وڵه‌تی لۆبنان له‌سه‌ر كار لاچوون، به‌ڵام هه‌تا ئێستا ده‌وڵه‌تی نوێ پێك نه‌هاتووه.