دادسەرای نیزامیی ورمێ داخوازیی لێخۆشبوون و ئازادیی بێمەرجی “فاروق شاروێرانی” و “ئەمیر پەیغامی”، دوو به‌ندكراوی سیاسیی خەڵکی شاری شنۆی لە زیندانی کرمان ڕەت کردەوە.
به پێی ڕاپۆرته‌كان، ئه‌م دوو به‌ندكراوه پاش بڵاوبوونەوەی ڤایروسی کۆرۆنا چەند ڕۆژ پێش هاتبوونە مورەخەسی و بۆ داخوازیی لێخۆشبوون و ئازادیی بێمەرج سەردانی دادسەرای نیزامیی شاری ورمێیان کردبوو. شایانی باسه، دادوەری په‌روه‌نده‌ی ئەو دوو زیندانییە سیاسییە و شارام پەناهیان دادوەری جێبەجێکاری حوکمی دادسەرای نیزامیی ورمێ، لەگەڵ داخوازیی ئەم دوو به‌ندكراوه سیاسییە دژایەتییان کردووە و بەوانی ڕاگەیاندووە کە لێخۆشبوون و ئازادیی بێمەرج نایانگرێتەوە.” جێگه‌ی ئاماژه‌یه، “فاروق شاروێرانی” و “ئەمیر پەیغامی” ڕۆژی یەکشەممە، ٧ی ڕەزبەری پاره‌كه، له‌ئاست هەڵسوکەوتی نەشیاوی بەرپرسی حیفازەتی زیندانی کرمان و گوشار خستنە سەر ئەو دوو زیندانییە، دەستیان دابووە مانگرتن. ئەو دوو زیندانییە ڕۆژی سێشەممە ١٤ی سەرماوەزی ٩٦، لە لایەن دادگای نیزامیی شاری ورمێ، سه‌رجه‌م به ٨ ساڵ زیندان و دوورخرانەوە بۆ زیندانی کرمان مه‌حكووم كرابوون.