ڕێكخراوی نه‌ته‌وه یه‌كگرتووه‌كان هەمو ساڵێک له ڕێكه‌وتی ٢٤ی ژانوییه كه بە رۆژى “خوێندن و پەروەردە” لە جیهاندا دیاریکراوە، ئاماری خوێندەوارى له سه‌رتاسه‌ری جیهان بڵاو ده‌كاته كه ئه‌مساڵ ژمارەیەکى ترسناک و جێى نیگەرانی بڵاوکردووەتەوە.
نەتەوەو یەکگرتوەکان له ڕاپۆرته‌كه‌یدا ئاماژه‌ی به‌وه كردووه كه ژمارەى ئەو کەسانەى کە نەخوێندەوارن لە جیهاندا گەیشتوەتە نزیکەى ٨٠٠ ملیۆن کەس و نزیکەى ٢٦٠ ملیۆن منداڵیش ناچنە مه‌دره‌سه و ناخوێنن. له ڕاپۆرته‌كه‌دا ئاماژە به‌وه‌ش کراوە کە قەیرانێکى گەورە هەیە لە بوارى فێربوندا و ئەو ژمارەیە جێگەى “دودڵییە” لەگەڵ ئەوەى ئامانجى کارکردنى نەتەوە یەکگرتوەکان تا ساڵى ٢٠٣٠ دەستەبەرکردنى خوێندنە بۆ هەمو کەسێک لە جیهاندا. هاوكات جێگرى ئەمیندارى گشتى نەتەوە یەکگرتوەکان رایگەیاندووە: نزیکەى ٧٧٠ ملیۆن کەسى پێ گەیشتوو بەدەست نەخوێندەوارییەوە دەناڵێنن کە زۆرینەیان ژنان و ئەمەش جێگەى نیگه‌رانییه. له لایه‌كی دیكه‌وه، گۆردن براون، نێردەى تایبەتى نەتەوەت یەکگرتووەکان بۆ بوارى خوێندن و فێرکردن و سەرۆک وەزیرانى پێشوى بریتانیا لە بارەى ژمارەى نەخوێندەوارى لە جیهاندا رایگەیاندووە: زیاتر لە ٤٠٠ ملیۆن منداڵ کاتێک دەگەنە تەمەنى ١١ ساڵى خوێندن جێدەهێڵن و ٨٠٠ ملیۆن منداڵیش سیستمى خوێندن جێدەهێڵن بێ ئەوەى هیچ شتێک فێربوبن و شایستەى ئەوە بن کارى پێ بکەن. ناوبراو ئاماژەى به‌وه‌ش كردووه، ئەوەى ئەم بارودۆخە ترسناکتر دەکات ئەوەیە ٧٥ ملیۆن منداڵ بەهۆى ئەوەى وڵاتەکەیان لە جەنگدان ناتوانن بچنەوە مه‌دره‌سه‌کانیان و لە خوێندن دادەبڕێن.