ڕاپۆرته‌كان باس له‌وه ده‌كه‌ن كه خۆپیشاندانه‌كان له شیلی، ڕۆژی هه‌ینی ٨ی سه‌رماوه‌ز پێی نایه ناو پێنجه‌مین حه‌فته‌ی خۆیه‌وه و هێزه ئه‌منییه‌كان به توندووتیژی به‌ره‌وڕووی خۆپیشانده‌ران بوونه‌ته‌وه.
به پێی ئه‌م ڕاپۆرته، هێزه ئه‌منییه‌كان و هێزه‌كانی پۆلیس بۆ بڵاوه‌پێكردن به ناڕازییان كه له سه‌ره‌تای مانگی سه‌رماوه‌زه‌وه له ناڕه‌زایه‌تیی به سیاسه‌ته‌كانی ده‌وڵه‌ت هاتوونه‌ته سه‌ر شه‌قامه‌كان و خۆپیشاندان ئه‌نجام ده‌ده‌ن، كه‌ڵكیان له گازی فرمێسكڕێژ و گولله‌ی مه‌شقی وه‌رگرتووه. شایانی باسه، له كاتی ده‌ستپێكی ناڕه‌زایه‌تییه‌كان هه‌تا ئێستا لانیكه‌م، ٢٣٠ كه‌س به‌هۆی ته‌قه‌ی ڕاسته‌وخۆی هێزه‌كانی پۆلیس كوێر بوون. هه‌ر له‌م پێوه‌نده‌دا، ڕۆژی هه‌ینی ژماره‌یه‌ك له خۆپیشانده‌ران به‌مه‌به‌ستی هاوده‌ردی له‌گه‌ڵ ئه‌م كه‌سانه، به باندپێچی كردنی ده‌مووچاویان له به‌رامبه‌ر كۆشكی سه‌رۆك كۆماری ده‌ستیانداوه‌ته كۆبوونه‌وه. جێگه‌ی ئاماژه‌یه، خۆپیشاندانه‌كان له شیلی، سه‌ره‌تا له‌كاردانه‌وه به چوونه‌سه‌ره‌وه‌ی قیمه‌تی بلیتی مێترۆ له سانتیاگۆ ده‌ستی پێكرد و دواتر به ڕاگه‌یاندنی مانگرتنی گشتیی له لایه‌ن یه‌كێتییه كرێكارییه‌كانه‌وه ئه‌م ناڕه‌زایه‌تییانه په‌ره‌یسه‌ند. شایانی باسه، ناڕازییان له درێژه‌ی خۆپیشاندانه‌كانیان، خوازیاری چوونه‌سه‌ره‌وه‌ی ئاستی حه‌قده‌سته‌كانیان، چاكسازیی بنه‌ڕه‌تی كۆمه‌ڵایه‌تیی و باشتربوونی سیستمی په‌روه‌رده له‌م وڵاته بوون.