له ماوه‌ی دوو ڕۆژی ڕابردوودا، به‌هۆی نه‌بوونی ئیمه‌نی شوێنی كار لانیكه‌م ١٥ كرێكار له شاره‌كانی كاروون، شووشته‌ر و هه‌مه‌دان به‌ڕووداوی شوێنی كار گیانیان له‌ده‌ستدا و برینداربوون.
به پێی ئه‌م ڕاپۆرته، له یه‌كه‌م ڕووداودا، چوار كرێكار به‌هۆی داڕووخانی چاڵی ئاوه‌ڕۆی نه‌خۆشخانه‌ی سینا له كاروون به سه‌ختی برینداربوون و به مه‌به‌ستی چاره‌سه‌ری پزیشكی گوازترانه‌وه بۆ ئه‌م نه‌خۆشخانه‌یه. له دووهه‌م ڕووداودا، كرێكارێك ٣٤ ساڵ ته‌مه‌ن له‌كاتی كار له‌سه‌ر چێوبه‌ست به‌ربووه‌وه و گیانی له‌ده‌ستدا. هه‌روه‌ها چوار كرێكاری شیلات له ئاوایی “ده‌رب خه‌زینه” سه‌ر به شارستانی شووشته‌ر، به‌هۆی هه‌ڵمژینی گازی ئامۆنیاك گیانی له‌ده‌ستدا و ٦ كرێكاری دیكه‌ش به سه‌ختی برینداربوون.