ئەیووب دەباغیان
١٧ی مارس ٢٠٢٢
٢۶ی ڕەشەممە ١۴۰۰
ئاشکرایە کە نەورۆز جەژنێکی دێرینی گشتگيره كه له لايەن زۆربەى گەلانى رۆژهەڵاتی ناوەراست، هەروها ڕۆژهەڵاتی دوور و تەنانەت بەشێک له ئوروپاش بەشێوازی جۆراوجۆر بەلام لەسەر يەك بنەما و ئامانج بەڕێوەدەچێت، كه ئەويش موژدەیە بۆ هاتنى بەهار و نۆی بوونەوەى سروشت و سەرلەنۆی سەوز بوونەوەى گژو گیاو ڕوەكه له سەر زەوى كه هەموو ساڵێک له یەکی خاكەلێوە روودەدات و تازه دەبێتەوه، هاوکات بەهار وەرزی ڕابوون و هەستانەوە، وەرزی گەڕانەوەی هیوا بە ژیان و ژیانەوەی مرۆڤەکانیشە.
بەڵام مخابن نەورۆزی گەلی کورد بە هەر چۆار بەشەکەیەوە، واتە باشور، باکور، رۆژهەڵات، رۆژئاوا تێکەڵاوی مەرگ و خوێن، کارەسات و مەرگەساتە، بەردەوام خوين له جەستەى تاك به تاكی و گەوره و بچوكی دەچۆڕێت و ساڵانێکە کورد قاڵبووی ڕۆژگارێکی پر لە نەهامەتی و کارەساتە و میژووەکەی خاوەن سەدان سەربردەی تاڵ و گەلێک خەم و بەسەرهاتە، نۆی بوونەوەی کۆمەڵێک خەمى قوول، ئێش و ئازارى جەرگ بڕ و زام و برینی ساڕێژ نەبۆوەى سەر جەستەیەتی و بەردەوام جیاکاری و هەڵاواردنی بەرامبەر کراوە و بە هەردوو زوڵمی چینایەتی و نەتەوایەتیش چەوسێنراوەتەوە و کۆمەڵکوژ کراوە.
بەهاری ۱۳۵۸ی هەتاوی و نەورۆزی خوێناوی سنه، دەسڕێژی گوللە لە خەڵکی مەدەنی شاری مەهاباد لە بەهاری ۵۸ دا و هەڵگیساندنی شەڕی نیوان کورد و تورک لە نەغەدە و کوشتن و بەتاڵان بردنی موڵک و ماڵی خەڵکی کوردی ئەوشارە، ئیعدامى ۵۹ لاو و گەنجی بێتاوانی سابڵاغ لە بەهاری ۱۳۶۲ دا، كارەساتى ئەنفال و کۆمەڵکوژ کردنی هەزاران مرۆڤی بێتاوان و بێدەسەڵاتی ناوچەکانی کوردستانی باشور، نەورۆزی هەڵەبجەی فرمێسک و خوێن و بۆمبارانی كيميايى شارەکە و ناوچەکە و قڕ کردن و لە ناوبردنى ۵۰۰۰ هەزار مرۆڤی بێتاوان له ژن، مناڵ، پير و گەنجى شارەکە لە شەو و رۆژێکدا و هەروەها گيان بەختكردنى هاوكاتى ۶۹ كادر و پێشمەرگەی گوردانى شوانى کۆمەڵە و حيزبى کۆمۆنیستی ئێران له ناوچەى هه‌ڵه‌بجه و چەمى سيروان، هيرش و داگيركارى حكومتى توركيا و اردوغان بۆ سەر ڕۆژئاوا و عەفرین، كوشتنى به لێشاوی خەڵکی بێتاوان و لەهەمانکاتدا خەبات و خۆراگری قارەمانانەی خەلكی رۆژئاواو، و دەيان كارەسات و كوشتارى به کۆمەڵی دیکە … بەڵگەن لەسەر بە جينوسايد كردنی گەل و نەتەوەی كورد.
وەك باسم کرد كورد له كوردستانی ئێرانیش بەشێک بووە له بەرکەوتەو قوربانى دەستى هێرش و داگیرکاری دەسەڵاتە فاشیست و کۆنەپەرستە و مەزهەبیە یەک لەدۆای یەکەکان کە بە هاتنیان و گرتنە دەستی دەسەڵات، دەستیان داوەتە سەرکوت و لە ناوبردنی کەمایەتیە ئایینی و نەتەوەیەکان. لەوانەش رژیمی کۆنەپەرست و دژە شۆڕشی كؤمارى ئيسلامی ئيران، كه له ماوەى پتر له چۆار دەیەی ڕابردوو به هەموو شێوەیەک داپڵوسینی كردووه و خەڵک و جەماوەری ئەشکەنجە و ئازار داوه و سەرەتايی ترین مافەكانيانى لێ زەوت کردوون و بەردەوام هەوڵی داوە هەر دەنگێکی حەق خۆازانە و ماف خوراوی دژ بەخۆی بە زەبری چەک و هێز، گرتن، کوشتن و راودوونان سەرکوت بکات.
رژیم بە هاتنە سەر کاری خۆسەپێنانەی بە هاوکاری و پشتیوانی ئەمریکا و هاوپەیمانە رۆژئاوایەکانی ئامریکا بۆ دەسەڵات، لە درێژەی داگیرکاریەکانی و هاتنی بۆ سەر کوردستان روبەروی مقاومەت و خۆڕاگری بێ وێنە و لێبڕاوانەی جەماوەری بوویەوە و بزوتنەوەی شۆڕشگێرانەی کوردستان لە بەرامبەریدا شکڵی گرت.
کۆماری ئیسلامی بە “نا“یەک کە لە جەماوەری خۆڕاگری کوردستان وەریگرت لە ڕیفراندۆمە نمایشێکەی ساڵی ١٣٥٨ دا وەریگرت، بۆ هەمیشە کوردی وەک گەلێکی دژبەر لە بەرامبەری خۆیدا بینی و لە هیچ کردەوەیەکی دوژمنکارانەی سیاسی، ئابوری، فەرهەنگی و کۆمەڵایەتی دەستی نەپاراست و ئەوەی بۆی کرا لە هەمبەر شەڕ فرۆشی، گرتن و ئەشکەنجە، تەنانەت کوشتن، ئێعدام و لە سێدارەدانی کچان و کوڕانمان لە شار و لادێکان ئەنجامی داوە و بە میلیتاریزە کردنی سەرجەم کوردستان ئەمنیت و ئاسایشی بۆ خەڵکی نەهێشتۆتەوە.
بەڵام جەماوەری کوردستان، کرێکاران، خەڵکی هۆشیار و پێشڕەو، سەرجەم چین و توێژەکانی کۆمەڵگا هەرگیز مل کەجی رژیم نەبوونە و کۆڵیان نەداوە، و لە بەرامبەر زوڵم و زۆر و داگیرکاری رژیم کۆتا نەهاتوون و لە پای ئەو بەڵێن و پەیمانە مانەوە کە بەر لە ۴۳ ساڵ پێش ئێستا دابوویانە خۆیان و خەباتی رزگاریخۆازی، و بە درێژای هەموو ئەو ساڵانە بەشێکی دانەبڕاو لە بزوتنەوەی شۆڕشگیرانە و سوسیالیستی کوردستان و باسکی بەهێزی “کۆمەڵە” و خەباتی لێبڕاو و بێ پسانەوەی بوون.
به لام وەک دەبینین ئيستاو لە پاش ۴۳ ساڵ کە رژیم لە هەموو کات زیاتر له قەيرانێکی قوڵی سياسى، ئابورى و کۆمەڵایەتی دايه چ له ئاستى ناوخۆیی چ له ئاستى ناوچەیی و نێودەوڵەتیەوە، و هەموو ئاماژەکان ئەوەمان پێدەڵێن کە رژيم له سەرەمەرگ و روخان نزیک بۆتەوه، بۆیە پێویستە ڕیزی یەکگرتوانەی خۆمان لە هەر جارێک زیاتر بەهێز و پتەوتر بکەین و ئيعتراز و خۆپیشاندانەكان له روى سياسى، ئابوری و کۆمەڵایەتی سەراسەرى و گشتگیرتر ببنەوە، و بتۆانرێت له ئاستى هەموو شارەكانى ئێران بەڕیوە بچن، و کرێکاران وەك چينى سەرەكى و بزوێنەری واقعى بەم ئاخیز و ناڕەزايەتيانه پەيوەست بکرێن.
لەم لاشەوە گەر چاو لێبکەین دەبینین رژیم لە ڕێگەی شۆڕای شارو گوندەکانی پارێزگای سنەی ڕایگەیاندووە کە دەیهەوێت بۆ بەشداری کردنی خەڵکی کوردستان لە بەڕیوەچوونی ڕیورەسمەکانی نەورۆزی ئەمساڵ مۆڵەت نامەیان پێ پڕ کاتەوە کە تێیدا کۆمەڵێک شەرت و شروتی داناوە لەوانە:
ـــ نەبوونی دخاڵەتی حیزبە دژبەرەکانی رژیم لە ریوەرەسمەکانی نەورۆز…
ـــ بەکار نەهێنانی هێماکانی نەورۆز وەک ئاڵای کوردی و حیزبی، گوڵی سور و بەخشینەوەی بە خەڵکی، ئاگر کرنەوەی نەورۆز و بەستنی جامانە…
ـــ ڕێگریکردن لە وتنەوەی سرود و گۆرانی شۆڕشگیرانە و حەماسی…
ـــ ڕێگری کردن لە هەڵپرکێ و شایی و خۆشی جەماوەر لە رۆژەکانی نەورۆزدا…
ـــ بەکارهێنانی ئاڵا و هێماکانی کۆماری ئیسلامی…
ئەگەرچی ئەم هەوڵە بێ بنەماو نایاسایەی کۆماری ئیسلامی هەر لە ئێستاوە و بەر لەوەی لەدایک ببێت، جنازەیەکە و بە سەر دەستی خاوەنەکانی دەمێنێتەوە، وەکوو هەوڵێکی دیکەی شکستخواردووی رژیم دائەنرێت و لە لایەن خەڵکی خۆڕاگری کوردستان و شاری سنە هیچ جۆرە بەهایەکی پێ نادرێت و ناتوانێت جەماوەری شۆڕشگیری کوردستان مل کەجی خۆی بکات. لە هەمان کاتدا دەرخەری ئەو ڕاستیەشە کە باسمان کرد، ئەویش هەلومەرجی خراپی سەرەمەرگانە و روو بە مەرگ و دۆخی قەیراناوی رژیمە لە هەموو بوارەکان.
کۆماری ئیسلامی پێیوایە بە دەست بردن بەم ئاکار و کردەوانە و هەوڵ بۆ ئەنجام دانی بە زەبری چەک و هێزە بەکرێگیراوەکانی دەتوانێت هەژموونی خۆی لە کۆنتڕۆڵ کردن و زاڵبوون بە سەر خەڵک و جەماوەردا بسەپێنێت، کە لە راستیدا و بە بڕوای من ڕێک پێچەوانەکەی روودەدات، و ئەگەرچی پەنابردن بۆ بیرۆکەی لەم جۆرە دەرخەری شکست و بێ هیوایی رژیمە، لە هەمان کاتیشدا ڕەنگدانەوەی نائۆمێدی و بێدەسەڵاتێتی بەرامبەر ورە و ئیرادەی لەبن نەهاتووی گەل و جەماوەری کوردستان کە بە کەڵک وەرگرتن لە هەر هەلومەرجێک، لەوانە بۆنەکانی نەورۆزیش دەنگی ئیعتراز و نارەزایەتیان دژ بە دەسەڵاتێک کە هێچ کات خۆازراو و قبوڵکراوی خەڵکی کوردستان نەبووە، و لە داگیرکەرێک زیاتر نییە ڕادەگەیێنن کە دەستی سورە بە خوینی هەزاران پیرو گەنجی کوردستان.
بەو هیوایەی هەنگاوەكانمان بۆ كۆتایی هێنان بە شەوەزەنگی دیكتاتوری خێراتر بكەين، با ورده ورده خۆمان بۆ لە ئامێز گرتنی بەهاری ئازادی و ڕزگاری هەتا هەتايى، لە كوردستان و ئێران ئاماده كەین. با ئێمە خەڵکی شۆڕشگێر و سەرجەم چين و توێژەكانى کۆمەڵگا نەورۆز و رۆژەكانی سەری ساڵ بكەين به دەرفەتێكی گونجاوە بؤ دريژه دان به خەبات و تێکۆشان به هەر شێوازێک كه بۆمان دەکرێت بۆ کۆتایی هێنان بە دەسەڵاتی ڕەشی كۆماری ئیسلامی ئێران.
نەورۆزتان خوش و پیرۆز
ورەوخۆڕاگریتانبەرزوبەردەوام.