وەزارەتی بەرگریی کۆماری ئازەربایجان ڕایگەیاند هێرشی درۆنی بۆ سەر ناوچەی نەخجەوان، بێ وەڵام نامێنێتەوە و هێزە سەربازییەکانی ئەو وڵاتە خەریکی ئامادەکردنی وەڵامێکی گونجاون.
پێشتر وەزارەتی دەرەوەی ئازەربایجان ڕایگەیاندبوو کە درۆنێک خۆی کێشاوە بە باڵەخانەی تێرمیناڵی فڕۆکەخانەی نەخجەوان و درۆنێکی تریش لە نزیک باڵەخانەی قوتابخانەیەک لە گوندی شەکرئاوا کەوتووەتە خوارەوە. لە بەیاننامەکەی وەزارەتی دەرەوەی ئازەربایجاندا جەخت کراوەتەوە: ” کە ئەم هێرشانە کە لە خاکی ئێرانەوە ئەنجام دراون و بە توندی ئیدانەی دەکەین.” ئەم بەیاننامەیە هەروەها ئەم کارەی بە پێشێلکردنی یاسا نێودەوڵەتییەکان و هۆکاری زیادبوونی گرژییە ناوچەییەکان ناو برد. بەرپرسانی ئازەربایجان ڕایانگەیاند کە وڵاتەکەیان مافی خۆیەتی هەنگاوی بەرامبەری گونجاو بگرێتە بەر.