ئه‌مڕۆ سێ شه‌ممه ١٣ی مانگی خه‌زه‌ڵوه‌ر، ڕۆژی خوێندكاره، ئه‌و ڕۆژه‌ی كه پێشینه‌كه‌ی بۆ مانگه‌كانی كۆتایی ڕژیمی په‌هله‌وی ده‌گه‌ڕێته‌وه. به‌ڵام ١٣ی خه‌زه‌ڵوه‌ر له سه‌رده‌می ڕژیمی كۆماری ئیسلامیدا، چه‌ندین بۆنه‌ی دیكه‌شی په‌یدا كردووه، كه هه‌موویان ناوی خوێندكاریان له‌سه‌ر داندراوه. به‌ڵام جیاوازیی نێوان ئه‌و بۆنانه‌ی كه به‌ناوی ڕۆژی خوێندكار، له ڕۆژی ١٣ی مانگی خه‌زه‌ڵوه‌ردا به‌ڕێوه‌ده‌چێت، له‌ڕاستیدا، جیاوازیی نێوان ڕیزی شۆڕش و دژه شۆڕشه له ئێران.
بۆنه‌ی یه‌كه‌م: ڕۆژی ١٣ی مانگی خه‌زه‌ڵوه‌ری ساڵی ١٣٥٧ی هه‌تاوی و له سه‌روبه‌ندی سه‌ركه‌وتنی ڕاپه‌ڕینی جه‌ماوه‌ری خه‌ڵك، ژماره‌یه‌ك له خوێندكاران له حه‌ساری زانكۆی تاران كۆبوونه‌وه و وێڕای دانشجوه‌كانی زانكۆ ده‌ستیان دایه خۆپیشاندان. هێزه نیزامییه‌كانی ده‌وڵه‌تی “شه‌ریف ئیمامی” به‌ره‌وڕووی خۆپیشانده‌ران ته‌قه‌یان كرد و به‌هۆیه‌وه ژماره‌یه‌كی زۆر له خوێندكاران گیانیان له‌ده‌ست دا. ده‌وڵه‌تی شه‌ریف ئیمامی كه هه‌مان ساڵ له ڕێكه‌وتی ١٧ی خه‌رمانان له مه‌یدانی ژاڵه كوشتارێكی خوێناویی وه‌ڕێخستبوو، ڕۆژێك دوای كوشتنی خوێندكاران له زانكۆی تاران، له‌سه‌ر كار لاچوو. پاش ڕووداوی خوێنینی ١٣ی خه‌زه‌ڵوه‌ری ساڵی ١٣٥٧، ئه‌و ڕۆژه به “خوێندكار قوتابی” پێناسه كرا.
بۆنه‌ی دووهه‌م: یه‌ك ساڵ دواتر پاش كاره‌ساتی خوێناویی زانكۆی تاران، ڕێك له وه‌ها ڕۆژێكدا له هه‌وڵێكی ڕێكخراو له لایه‌ن حیزبوڵڵاییه‌كانی په‌یڕه‌وی خومه‌ینی، باڵوێزخانه‌ی ئه‌مریكا له تاران داگیر كرا و ٥٢ دیپلۆمات و كارمه‌ندی باڵوێزخانه‌كه به بارمته گیران. ڕێكخه‌رانی نومایشی فریوكارانه‌ی داگیر كردنی باڵوێزخانه‌ی ئه‌مریكا، به‌و كرده‌وه‌ی خۆیان كه نزیك به ساڵ و نیوێكی خایاند، باڵوێزخانه‌ی داگیركراوی ئه‌مریكایان كردبه ناوه‌ندی ڕاگه‌یاندنی سیاسه‌تی ده‌سه‌ڵاتی دژه شۆڕشی سه‌رانی ڕژیم. داگیركردنی باڵوێزخانه‌ی ئه‌مریكا كه ئه‌ساسه‌ن به فه‌رمانی خومه‌ینی به‌ڕێوه‌چووبوو، به‌هۆی ئه‌وه‌یكه ده‌ور و نه‌خشێكی گرینگی له پاشه‌كشه پێكردن به ڕه‌وته چه‌پ و ڕادیكاڵه‌كان و سه‌ركوتی شۆڕش هه‌بوو، خۆمه‌ینی ناوی “ئینقلابی دووهه‌می” له‌سه‌ر دانا. به‌ڵام له ڕاستیدا ئینقلابی دووهه‌م جگه له درێژه‌ی سه‌ركوتی شۆڕشی ئازادیخوازانه‌ی خه‌ڵكی ئێران له لایه‌ن كۆنه‌په‌رستانی ئیسلامییه‌وه، شتێكیتر نه‌بوو. درووشمی “مه‌رگ بۆ ئه‌مریكا” كه له‌م ڕۆژه‌وه زیاتر كه‌وته سه‌ر زاری حیزبوڵڵاییه‌كان، بوو به بیانوویه‌ك بۆ كپ كردنی ده‌نگی هه‌موو نه‌یاران. له‌م ڕۆژه‌وه به‌ره‌و ئه‌ملا، دار و ده‌سته‌ی هاندراوی حیزبوڵڵا كه‌وتنه گیانی كۆمۆنیسته‌كان و هه‌موو ئینسانه ئازادیخواز و سكۆلاره‌كان و ده‌ستیان كرد به لێدان و كوشتن و بڕین. ئه‌م ڕووداوه ده‌ستپێكی سه‌ركوتی شۆڕشی ئازادیخوازانه‌ی خه‌ڵكی ئێران له لایه‌ن ده‌سه‌ڵاتی كۆنه‌په‌رستی زاڵه‌وه بوو. شۆڕشێك كه ڕژیمی شا نه‌یتوانیبوو سه‌ركوتی كات، پاش ڕووداوی داگیركردنی باڵوێزخانه‌ی ئه‌مریكا، سه‌ركوته‌كه‌ی به شێوازێكی وه‌حشیانه‌تر له لایه‌ن ڕژیمی تازه به‌ده‌سه‌ڵات گه‌یشتۆوه به‌ڕێوه‌چوو. زۆرێك له ڕێكخه‌رانی ئه‌وسه‌رده‌می داگیركردنی باڵوێزخانه‌ی ئه‌مریكا، دواتر بوون به دامه‌زرێنه‌رانی سپای پاسداران و ده‌زگا ئیتلاعاتییه‌كانی ڕژیم و ئه‌شكه‌نجه‌گه‌ر و زیندانبان.
بۆنه‌ی سێهه‌م: له ١٣ی مانگی خه‌زه‌ڵوه‌ری ١٣٨٨ی هه‌تاویدا كه نزیك به ٥ مانگ له ڕاگه‌یاندنی ئاكامی ١٠مین ده‌وره‌ی هه‌ڵبژاردنی سه‌رۆك كۆماری تێپه‌ڕ ببوو، بۆ ڕێزگرتن له ڕۆژی خوێندكار، خۆپیشاندانێكی به‌رین به‌ڕێوه‌چوو كه له ڕاستیدا ناڕه‌زایه‌تییه‌ك بوو دژبه ڕژیمی كۆماری ئیسلامی و به ده‌سه‌ڵات گه‌یشتنی ئه‌حمه‌دی نه‌ژاد له ڕێگه‌ی ساخته‌كاریی به‌رینی هه‌ڵبژاردنه‌وه. ئه‌گه‌رچی ڕه‌وتی ئۆپۆزیسیۆنی ڕادراو له ده‌سه‌ڵات، هه‌وڵی ده‌دا كه لاوان له هه‌رجۆره حه‌ره‌كه‌تێك دژبه گشت ڕژیمی ئیسلامی به‌دوور بگرن، به‌ڵام لاوان به درووشمی “مه‌رگ بۆ دیكتاتۆر” ده‌ستپێشخه‌ری و هیدایه‌تی ئه‌م خۆپیشاندانه‌یان به‌ده‌سته‌وه گرت.
بۆنه‌ی چواره‌م، ڕۆژی به‌سیجی دانش ئامووزی: كۆماری ئیسلامی، ئه‌م ڕۆژه‌ی به‌یادی منداڵێكی قوربانی به‌ناوی “حسێن فه‌همیده”، ناو لێناوه. فه‌رمانده‌كانی ڕژیمی ئیسلامی له ڕۆژی ٨ی خه‌زه‌ڵوه‌ری ساڵی ٥٩ی هه‌تاویدا، ئه‌م منداڵه قوتابییه‌یان، له عه‌مه‌لیاتێكی خۆكوژیدا، له حاڵێكدا كه نارنجۆكیان به نێوقه‌دییه‌وه به‌ستبوو، نارده ژێر تانكه عێراقییه‌كانه‌وه. ئه‌م منداڵه بێ تاوانه، كه له كاتی تیكه تیكه بوونیدا، له كوتی شێخ، له‌وبه‌ری ڕووباری خوڕه‌مشار، ته‌مه‌نی ته‌نیا ١٣ ساڵ بوو، پێش قه‌ڕه‌وڵی ئه‌و ٣٦ هه‌زار قوتابییه بوو كه دواتر له لایه‌ن سه‌رانی جه‌نایه‌تكاری كۆماری ئسیلامی وه‌ك خاوێنكه‌ره‌وه‌ی مه‌یدانه‌كانی مین و له ئۆپراسیۆنی هاوشێوه‌دا، له شه‌ڕی ئێران و عێراقدا كرانه قوربانی. له به‌رامبه‌ر هه‌وڵه‌كانی ڕژیم بۆ به‌رینتر كردنه‌وه‌ی سازمانی به‌سیجی دانش ئامووزی و به‌كار هێنانی ئه‌وان به‌ئامانجی پۆلیسی كردنی ناوه‌نده‌كانی فێركردن، ئه‌مڕۆ به هیمه‌تی خوێندكارانی پێشڕه‌و و خه‌باتكار و موعه‌لیمانی ئازادیخواز، پڕۆژه‌ی به‌سیجی دانش ئامووزی، له سازمانێكی فۆرماڵ بۆ ڕاكێشانی قوتابییان به‌ره‌و نومایشه‌كانی سه‌رشه‌قامی ڕژیم، زیاتر نییه.
كۆماری ئیسلامی له ماوه‌ی ٤١ ساڵی ڕابردوودا، له پێناو وه‌دی هێنانی ئامانج و پڕۆژه‌كانی خۆی له‌ناو خوێندكارانی ئێراندا، به‌رده‌وام هه‌وڵی داوه تا به به‌ڕێوه‌بردنی به‌رنامه‌ی هه‌ڵاواردنی ڕه‌گه‌زی له ناوه‌نده‌كانی فێركردن، به گۆڕینی ناوه‌رۆكی كتێبه ده‌رسییه‌كان و لابردنی هێندێك له ده‌ر‌سه‌كانی زانستی مرۆیی له زانكۆكان، به ناردنی ئاخوند و پاسدار بۆ مه‌دره‌سه‌كان، به پادگانی كردنی مه‌دره‌سه و زانكۆكان و به خوڵقاندنی هه‌مووجۆر به‌ربه‌ستێكی ئه‌خلاقی، لاوان ناچار به ملكه‌چی و بێده‌نگ بوون بكات. به‌ڵام لاوانی ئێران له زانكۆ و مه‌دره‌سه‌كان و له ده‌ره‌وه‌ی ئه‌م ناوه‌ندانه، به خه‌باتی شكۆداری خۆیان، به‌رده‌وام یه‌كێك له سه‌نگه‌ره‌كانی موقاومه‌ت له به‌رامبه‌ر كۆنه‌په‌رستیی كۆماری ئسلامی بوون و ئه‌م سیاسه‌تانه‌ی ڕژیم بێ ئاكام ماونه‌ته‌وه.
به‌ده‌ر له هه‌وڵه‌كانی ڕژیمی ئیسلامی بۆ زه‌وت كردنی بۆنه‌ی ڕۆژی خوێندكار، ١٣ی مانگی خه‌زه‌ڵوه‌ر بۆ قوتابییان و خوێندكارانی خه‌باتكار، وه‌بیرهێنه‌ره‌وه‌ی گیانفیدایی ئازیزانێكه كه له به‌رامبه‌ر هه‌ر دوو ڕژیمه كۆنه‌په‌رسته‌كانی ئیسلام و پاشایه‌تی دا، سینگیان كرده قه‌ڵغان و شان به شانی كرێكاران و زه‌حمه‌تكێشان، دژبه كۆنه‌په‌رستیی زاڵ و له‌پێناو ده‌سته‌به‌ر كردنی ئازادی، گیانبازییان نواند.