ڕۆژی شه‌ممه ١٠ی گه‌ڵارێزان، له ئه‌نجامی ڕوودانی دوو هێرشی جیاجیا له شاری “كێبێك”ی كانادا و كلیسایه‌كی ئۆرتۆدۆكسی یونانی له شاری لیۆنی فه‌ڕانسه، دوو هاووڵاتیی گیانیان له‌ده‌ستدا و ٦ كه‌سی دیكه‌ش برینداربوون.
ڕاپۆرته‌كان باس له‌وه ده‌كه‌ن كه له ئه‌نجامی هێرشی پیاوێكی چه‌قۆ به‌ده‌ست له شاری “كێبێك”ی كانادا، لانیكه‌م دوو كه‌س گیانیان له‌ده‌ست داوه و ٥ كه‌سی دیكه‌ش برینداربوون. شایانی باسه، به‌دوای ئه‌م ڕووداوه، پۆلیسی كێبێك داوای له خه‌ڵك كردووه كه له ماڵه‌كانیان بمێننه‌وه. هه‌روه‌ها له ئه‌نجامی ته‌قه‌كردنی كه‌سێكی نه‌ناسراو له به‌رامبه‌ر كلیسایه‌كی ئۆرتۆدۆكسی یونانی له شاری لیۆنی فه‌ڕانسه، قه‌شه‌یه‌ك به سه‌ختی برینداربوو. جێگه‌ی ئاماژه‌یه، دوو ڕۆژی له‌مه‌وبه‌ر، هێرشبه‌رێكی ته‌مه‌ن ٢١ ساڵی خه‌ڵكی تونێس به ناوی “ئیبراهیم عوساوی” به چه‌قۆ هێرشی کردبووه سەر کلیسایەکی شاری نیس له فه‌ڕانسه و له ئه‌نجامدا سێ کەسی كوشتبووه. هه‌روه‌ها دوو حه‌فته له‌مه‌وبه‌ریش، لاوێك ١٨ ساڵ ته‌مه‌نی توندرۆی ئیسلامیی، له شاری پاریس پێته‌ختی فه‌ڕانسه به چه‌قۆ هێرشی كردبووه سه‌ر مۆعه‌لیمێك به ناوی “سامۆئێل پاتی” كه كاریكاتۆرێكی گاڵه‌ته‌ئامێزی له “محه‌ممه‌د” پێغه‌مبه‌ری مسوڵمان كێشابووه‌وه.