کۆمیسیۆنی باڵای مافەکانی مرۆڤی عێراق رایدەگەیەنێت؛ تاوانی تیرۆرکردنی رۆژنامەنوسان و چالاکوانان چوەتە قۆناغێکی مەترسیدارەوە.
کۆمیسیۆنی باڵای مافەکانی مرۆڤی عێراق لە بەیاننامەیەکدا ئاماژەی بەوەکردووە، لەدوای دەستپێکردنی خۆپیشاندانەکان لە ناوچە جیاوازەکانی عێراق، تیرۆرکردنی رۆژنامەنوسان و چالاکوانان گەیشتوەتە قۆناغێکی مەترسیدار. هەروەها پێشنیار دەکات کە حکومەتی کاربەڕێکار داوا لە وەزارەتی ناوخۆ و دامەزراوە هەواڵگرییەکان بکات کە رێکاری ئازایانە و بەرپرسیارانە بگرنە بەر و شانەی روبەڕوبونەوەی ڕفاندن و تاوانی رێکخراو کارا بکەن بۆ پاراستنی گیانی خۆپیشاندەران و رۆژنامەنوسان و چالاکوانان. ئەوە لەکاتێکدایە كه لەماوەی رابردوودا، ژمارەیەک چالاکوان و رۆژنامەنوس لە ناوچە جیاوازەکانی عێراق و بەغدای پایتەخت تیرۆرکراون یاخود رفێندراون کە دواترینین ڕۆژی یەکشەممە تیرۆرکردنی رۆژنامه‌نوس و چالاكوانی ناسراوی خۆپیشاندانەكانی بەغدا “حەقی ئیسماعیل عەزاوی” بوو.