ڕاگەیاندنی کۆنفڕانسی تەشکیلاتی دەرەوەی وڵاتی حیزبی کۆمۆنیستی ئێران
بەمجۆرە ئاگادارتان دەکەینەوە کە چواردەهەمین کۆنفڕانسی تەشکیلاتی دەرەوەی وڵاتی حیزبی کۆمۆنیستی ئێران لە ڕۆژانی ٢٢ تا ٢٤ی ئاگۆستی ٢٠٢٥ لە وڵاتی سوید بەڕێوەچوو. لەم کۆنفڕانسەدا جگە لە نوێنەرانی هەڵبژێردراوی ڕێکخراوەکانی حیزب لە وڵاتە جۆراوجۆرەکان، ژمارەیەک لە هاوڕێیانی حیزبی و هەروەها چەند کەس لە هاوڕێیان بە نوێنەرایەتی لەلایەن هەیئەتی ئیجرایی حیزبی کۆمۆنیستی ئێرانەوە وەک چاودێر بەشدار بوون. کۆنفڕانسەکە بە خوێندنەوەی سروودی ئینتێرناسیۆناڵ و خولەکێک بێدەنگی بۆ ڕێزگرتن لە یادی گیانبەختکردوانی ڕێبازی ئازادی و سۆسیالیزم دەستی پێکرد.
کارنامەی دانیشتنەکانی کۆنفڕانس بریتی بوون لە:
١– باس و گفتوگۆ لەسەر بەڵگەنامەی هەڵسەنگاندنی سیاسی و تەشکیلاتی کۆمیتەی دەرەوەی وڵاتی حیزبی کۆمۆنیستی ئێران.
٢– تاوتوێکردنی بڕیارنامە پێشنیار کراوەکان
٣– هەڵبژاردنی کۆمیتەی نوێی تەشکیلاتی دەرەوەی وڵاتی حیزب.
لە تەوەری باس و گفتوگۆ لەسەر بەڵگەنامەی هەڵسەنگاندن کە زۆرترین کاتی کۆنفڕانسەکەی بەخۆی تەرخانکرد، بەشداربووان بە تێبینی و سەرنجی بنیاتنەرانەی خۆیان هەلسەنگاندنەکەیان دەوڵەمەندتر و دەقیقتر کرد و دواجار پەسەندیان کرد. بڕیاردرا لەسەر بنەمای گفتوگۆکانی کۆنفڕانس، بەیاننامەیەکی سیاسی بڵاوبکرێتەوە. هەروەها دوای تاوتوێکردنی بڕیارنامە و پێشنیارەکان و هەندێک بابەتی تەشکیلاتیی حیزب لە دەرەوەی وڵات، کۆمیتەیەکی نوێ کە پێکهاتبوو لە ١٢ کەس، بۆ بەرەوپێشبردنی ئەرک و چالاکییەکانی حیزب لە دەرەوەی وڵات هەڵبژێردرا. هاوڕێیانی هەڵبژێردراو بریتین لە:
هێمن ئەمانی، فەراست ساڵحی، ڕزگار ئەحمەدی، گەلاوێژ ڕۆستەمی، وریا ئەحمەدی، فەرهاد فەتاحی، هێرش فەتحی، عەباس گەوێڵی، ڕۆئیا مەحمودی، ئیقباڵ شەهبازی، کەریم ئەمانی و کاوە ئەلیاسی.
کۆنفڕانس دوای نزیکەی سێ ڕۆژ دانیشتن و قسە و باسی چڕ و پڕ، لە کەشێکی گەرم و گوڕ و هاوڕێیانەدا و دوای پێشکەشکردنی وتاری کۆتایی لەلایەن هاوڕێ عادڵ ئەلیاسی، کۆتایی بە کارەکانی هێنا.
کۆمیتەیدەرەوەیوڵاتیحیزبیکۆمۆنیستیئێران
٢٥ی ئاگۆستی ٢٠٢٥