به پێی ڕاپۆرته‌كان، له ماوه‌ی ڕۆژانی ڕابردوودا دوو به‌ندكراوی سیاسی به ناوه‌كانی “سه‌كینه په‌روانه” و “ئه‌ندیشه سه‌دری” له زیندانی ئێوینی تارانه‌وه گوازراونه‌ته‌وه بۆ زیندانه‌كانی قوچان و سنه.
به پێی ئه‌م ڕاپۆرته، “سەکینە پەروانە” بەندکراوی سیاسی کە به پێنج ساڵ زیندام مه‌حكووم كراوه و له زیندانی ئێوینی تاران ڕاگیراوه، ڕۆژی سێشەممەی ئه‌م حه‌فته‌یه گوازترایه‌وه بۆ زیندانی ناوەندیی قوچان لە ئۆستانی خوراسانی ڕەزەوەی. جێگه‌ی ئاماژه‌یه، سەکینە پەروانە تەمەن ٣٠ ساڵ، ڕۆژی ١٨ی ڕێبەندانی پاره‌كه لە کاتی گەڕانەوە لە هەرێمی کوردستان دەستبەسەر و لە گرتووخانه‌ی ئیتلاعات لە بەندی ٢٠٩ی زیندانی ئێوینی تاران ڕاگیرابوو. له لایه‌كی دیكه‌وه، ڕۆژی شەممە ٣ی گه‌ڵارێزان، “ئەندیشە سەدری” دەرچووی کۆلیژی هونەر دوای نزیک بە سێ حەفتە لە دەستبەسەر کرانی لە بەندی ٢٠٩ی زیندانی ئێوینه‌وه بۆ ناوەندی چاکسازی و پەروەردە ناسراو بە بەندی ژنانی زیندانی ناوەندیی شاری سنە گوازراوەتەوە. ناوبراو لە پەیوەندییەکی کورتی تەلەفوونیدا بنەماڵەکەی ئاگادار کردووەتەوە کە بەمەبستی درێژەی لێپرسینەوەکانی، لە لایەن ئیتلاعاتی سنە بۆ زیندانی ئەو شارە گوازراوەتەوە. جێگه‌ی ئاماژه‌یه، ئەندیشە سەدری لەگەڵ چالاکێکی دیكه بە ناوی “ندا پیرخزریان” و باوکی بەناوی لوقمان پیرخزریان و سێ هاووڵاتیی دیکە بە ناوەکانی “شەبنەم ئاشووری، ئارەش جەواهری و ئه‌لوار قولی وەند” ڕۆژی سێشەممە ۱۵ی ڕەزبەر لەلایەن هێزەکانی وەزارەتی ئیتلاعات لە شاری تاران دەستبەسەر کرابوو.