به پێی ڕاپۆرته بڵاوكراوه‌كان، بەندکراوێکی سیاسی خەڵکی کرماشان کە لە زیندانی ناوەندیی ورمێ مانی لە خواردن گرتبوو، گوازتراوه‌ته‌وه بۆ ژووری تاکەکەسی ئه‌م زیندانه.
بەپێی ئه‌م ڕاپۆرته، ڕۆژی شەممە ١٧ی گه‌ڵارێزان، “عەلی محەممەدی موقەدەم”، بەندکراوی سیاسی خەڵکی کرماشان کە ماوەی ٤ ڕۆژە مانی لەخواردن گرتووە، لە لایەن بەرپرسانی زیندانی ناوەندیی ورمێه‌وە بۆ ژووری تاکەکەسیی ئەو زیندانه ڕاگوێزراوه. جێگه‌ی ئاماژه‌یه، ناوبراو کە ماوەی ١٨ ساڵەی حوکمی بەندکرانەکەی لە زیندانی ناوەندیی ورمێ تێپەڕ دەکات، لە ڕۆژی چوارشەممە ١٤ی گه‌ڵارێزانه‌وه، مانی له خواردن گرتووه. شایانی باسه، “عەلی محەممەدی موقەدەم” بەهۆی ڕاگیرانی لە دۆخێکی نالەبار بۆ ماوەی ١٥ مانگ لە ژووری تاکەکەسی تووشی نەخۆشی “ئیسکیزفۆنی” بووە و کۆمیسیۆنی پسپۆڕی پزیشکی دادوەریی ورمێش پشتڕاستی کردووەتەوە و مانگی ڕابردوو لقی دووی دادسەرای سەربازی تاران نامەیەکی بۆ بەرپرسانی زیندانی ورمێ ناردووە و داوای کردووە کە ناوبراو بگوازنەوە بۆ نەخۆشخانەی ڕازی، بەڵام بەرپرسانی زیندان هەتا ئێستا لە گواستنەوەی ئەو بەندکراوە سیاسییە خۆیان بواردووە.