وەزارەتی تەندروستیی عێڕاق ڕایگەیاندووه، ٣٧حاڵەتی نوێی توشبوون بە كۆرۆنا لە شارەکانى “بەغدا، بەسرە، کەرکوک، نەجەف، دیالە، موسەنا، میسان، کەربەلا و واست” تۆمار كراون. هه‌روه‌ها دوو كه‌سیش به‌هۆی ئه‌م ویرووسه‌وه گیانیان له‌ده‌ستداوه.
به پێی ڕاگەیەندراوی وەزارەتى تەندروستی و ژینگەى عێراق كه ڕۆژی شەممە بڵاوكرایه‌وه، ٣٧ حاڵەتی نوێی توشبوون بەم ویرووسه تۆمارکراوە و به‌مجۆره هه‌تا ئێستا، ٥٠٦ كه‌س له عێراق به ویرووسی كۆرۆنا توشبوون و لەو ژمارەیەش ٤٢ کەس گیانیان لەدەستداوە و ١٣١ كه‌سیش چاکبوونەته‌وە. هاوكات وەزارەتى تەندروستى هەرێمی كوردستان ڕایگه‌یاندووه: لە ٢٤ سەعاتى رابردوودا، ٩ حاڵەتى توشبون بە کۆرۆنا له شاره‌كانی هه‌وڵێر و هه‌ڵه‌بجه تۆمار کراوە. بەپێى راگەیەندراوەکە، کۆی گشتی هەڵگرانی ویرووسی کۆرۆنای نوێ ناسراو به كۆڤیدی ١٩، لە هەرێمی کوردستان بۆ ١٢١ كه‌س بەرزبووەتەوە و له‌و ژماره‌یه، دوو كه‌س گیانیان له‌ده‌ستداوه و ٥١ كه‌سیش چاکبوونه‌ته‌وه.