ئەندامانیبەشدارلەکۆنگرەیسێزدەیەمی حیزبی کۆمۆنیستی ئێران،لەناخی دڵەوە درود دەنێرن بۆ ئێوە کە بوێرانە لەبەرامبەر کۆنەپەرستیی دەسەڵاتداردا اوەوەستاون وخەبات وتێکۆشانی قارەمانانەتان لە پشت تێلبەندەکانی زیندانەوە، بەر زدەنرخێنین. زایەڵەی بەرزی خەباتتان، تین و تەوژمێکی زۆر بە بزووتنەوە بەرین و بەربڵاوەکانی دەرەوەی زیندان دەبەخشێت و بێگومان ئەم خەباتە بەربڵاو و هەمەلایەنەیە، کاریگەریی لەسەر خەبات و ناڕەزایەتییەکانی ئێوەی ناو زیندانەکانیش دادەنێت. ئەم خۆڕاگرییە مێژوویی و خاوەن ڕەگ و ڕیشەیە، ئێستا ئیتر بووەتە بەشێکی دانەبڕاو لە ئاخێزی شۆڕشگێڕانەی “ژن، ژیان، ئازادی” و تا دێت لەگەڵیدا زیاتر ئاوێتە و قووڵتر دەبێتەوە. چاونەترسی و بوێریی ناوازەی ئێوە ژنان و پیاوانی بەندکراو، بەرامبەر بە جینایەتکاران و ستەمکاران، بەڵگەیە بۆ ئەم ڕاستییە. لە ڕوانگەیەکی ترەوە، ئەم ئاستە بەرزەی بوێری و چاونەترسییە، نیشانەی هاوسەنگی هێزێکی ئومێدبەخشە کە لەسەر بەستێنی ئەم ئاخێزە شۆڕشگێڕانەیە پێکهاتووە. بوێری و خۆڕاگریی بێهاوتای ئێوە، لە نێو چین و توێژە جەماوەرییەکانی دەرەوەی زیندان، جێگای ڕێز و پێزانینە و بەرز دەنرخێنرێت. بێهۆ نییە کە دروشمی زیندانیی سیاسیی دەبێ ئازاد بکرێت، لە سەرەوەی هەموو دروشمەکانی خەبات و ناڕەزایەتییەکانی دەرەوەی زینداندایە.
ئازیزان، خەبات و تێکۆشانی قارەمانانەتان لە ناو زیندانەکاندا، بە تایبەت خەباتی بەردەوامتان لەپێناو هەڵوەشاندنەوەی سزای لە سێدارەدان، هاوڕێ لەگەڵ ئەو بزووتنەوە کۆمەڵایەتییە بەهێزانەی کە هەر ئێستا لە دەرەوەی زیندانەکان لە ئارادان و هەروەها لەسەر بەستێنی ئەو قەیرانە قووڵ و چارە هەڵنگرانەی کە بەرۆکی بە ڕژێمی دەسەڵاتدار گرتووە، مژدەی ئەوەمان پێ دەبەخشن کە لە داهاتوویەکی نەک زۆر دووردا، شۆڕشی ڕزگاریخوازانەی جەماوەر، دەرگای زیندانەکان تێدەشکێنێ و ئێوەش بە سەربەرزی و بە کۆڵێک زانست و ئەزموونەوە، دەگەڕێنەوە ناو کۆڕی گەرمی بنەماڵە و ناو ڕیزی هوسەنگەرەکانتان.
کۆنگرەی سێزدەیەمی حیزبی کۆمۆنیستی ئێران
ئۆکتۆبری ٢٠٢٤
ڕەزبەری ١٤٠٣