ڕۆژی سێشه‌ممه ٢٦ی پووشپه‌ڕ، كۆمه‌ڵێك له ژنانی تێكۆشه‌ری ڕۆژهه‌ڵاتی كوردستان له چه‌ند چالاكی جیاجیادا، پشتیوانی خۆیان له شه‌ریفه محه‌ممه‌دی و هه‌موو چالاكانی ژنی به‌ندكراو له گیلان ده‌ربڕی.
ژنانی ئازادیخواز له چه‌ند شاری پارێزگاكانی كرماشان و كوردستان وێڕای شه‌رمه‌زاركردنی حوكمی ئێعدامی شه‌ریفه محه‌ممه‌دی، خوازیاری هه‌ڵوه‌شاندنه‌وه‌ی ئه‌و حوكمه و ئازادی بێ شه‌رت و مه‌رجی ئه‌و چالاكه كرێكارییه بوون. ژنانی ئازادیخواز و به‌رابه‌ری ته‌ڵه‌بی ڕۆژهه‌ڵاتی كوردستان له په‌یامه‌كانیاندا ڕایانگه‌یاند كه سه‌پاندنی سزای قورسی زیندان و ئێعدام به‌سه‌ر چالاكوانانی ژنی گیلان، نیشانه‌ی ترسی ڕژیم له پێشه‌نگایه‌تی ژنان له بزووتنه‌وه كۆمه‌ڵایه‌تیه‌كانه و هه‌ر ئه‌و جۆره كه ژنانی گیلان بۆ پشتیوانی له ژنانی كوردستان ڕژانه سه‌ر شه‌قام، ژنانی كوردستانیش به هه‌موو شێوه‌یه‌ك پشتیوانی له ژنانی پێشه‌نگی گیلان ده‌كه‌ن.