ڕۆژی هه‌ینی ٧ی مانگی سه‌رماوه‌ز، مۆحسێن فه‌خری زاده، سه‌رۆكی ڕێكخراوی لێكۆڵینه‌وه و داهێنانی وه‌زاره‌تی دیفاع، له ئۆپراسیۆنێك دا له ئابسه‌ردی دۆروود له‌گه‌ڵ یه‌كێك له پارێزه‌ره‌كانی كوژران. ئه‌و زانیاریانه‌ی كه بوون به‌هۆی سه‌رگرتنی ئه‌م ئۆپراسیۆنه، چۆن به‌ده‌ست هاتبوون؟ شێوازی ئه‌نجام دانی ئۆپراسیۆنه‌كه و هه‌ڵاتنی هێرشبه‌ره‌كان، هه‌ر هه‌مووی نیشانه‌ی به‌رنامه‌ڕێژییه‌كی ورد و كار له‌سه‌ر كراوه. ئه‌گه‌ر ئه‌م ڕووداوه ئه‌وجۆره‌ی كه سه‌رچاوه‌كانی ڕژیم باسی لێده‌كه‌ن، ڕووی دابێت، له دوو ڕوانگه‌وه جێگای هه‌ڵسه‌نگاندنه:
یه‌كه‌م، كوژرانی كارناسێكی ئه‌تۆمی و مووشه‌كی، شكستێكی گه‌وره بۆ به‌ره‌وپێش بردنی پڕۆژه نیزامییه‌كانی كۆماری ئیسلامی به‌حیساب نایه، له‌به‌ر ئه‌وه‌یكه پڕ كردنه‌وه‌ی جێگاكه‌ی ناتوانێ كارێكی زۆر دژوار بێت. به‌ڵام به‌ر له هه‌موو شتێك، نیشانه‌ی پووشاڵی بوونی توانای كۆنتڕۆڵ و چاوه‌دێریی ئه‌منییه‌تیی ڕژیمه كه به‌رده‌وام هه‌وڵ ده‌دات، ڕاده‌ی كارایی و ئۆتۆریته‌ی خۆی له‌م بواره‌دا، به‌ڕووی خه‌ڵك بكێشێ. بۆ ده‌زگا نیزامی و ئه‌منییه‌تییه‌كانی ڕژیم، ئاسانه كه داوود ڕه‌فیعی، هه‌ڵسووڕاوی كرێكاری، به تۆمه‌تی “سووكایه‌تی” به عه‌لی ره‌بیعی، وه‌زیری پێشووی كار، له دادسه‌رای ئێوین وه‌به‌ر شه‌للاق بده‌ن، جه‌نایه‌تێك كه ڕۆژی ڕابردوو ئه‌نجام درا. بۆ كۆماری ئسیلامی كوشتنی به‌ندكراوانی ده‌ست به‌ستراو له‌ناو زیندانه‌كان و ئه‌شكه‌نجه‌ی خۆفناك ئاسانه، به‌ڵام پاراستنی گیانی كارناسانی گرینگترین و پڕخه‌رجترین پڕۆژه نیزامییه‌كانی، دژواره. به‌ند كردنی نه‌رگس محه‌ممه‌دی و نه‌سرین ستوده ئاسانه، به‌ڵام له پاراستنی گیانی مۆره سه‌ره‌كییه‌كانی وه‌ك قاسم سوله‌یمانی و ئه‌بومۆهه‌ندێس و فه‌خری زاده، داماوه. له‌شكره‌كانی، ده‌توانێ له‌سه‌ر شه‌قامه‌كان، له گیانی ڕیزی ناڕه‌زایه‌تیی ئاشتی خوازانه‌ی خه‌ڵك به‌ردات، به‌ڵام له به‌رامبه‌ر تیمێكی عه‌مه‌لییاتی دا، كه به ڕۆژی ڕووناك، سه‌ر ڕێگای زانا ئه‌تۆمییه‌كه‌ی ده‌گرن، ده‌یكوژن و به‌ر له‌وه‌یكه “سه‌ربازانی گۆمنامی ئیمامی زه‌مان” بگه‌نێ، شوێنه‌كه جێ دێڵن، داماو و بێتوانایه. لێشاوی هه‌ڕه‌شه‌ی پووشاڵیی خامنه‌یی و فه‌رمانده‌كانی سپا و كاربه‌ده‌ستانی ده‌وڵه‌ت، له ڕۆژی پاش ڕووداوه‌كه‌دا، به هیچ شێوه‌یه‌ك ناتوانێ ئه‌م بێ تواناییه داپۆشێت. ئه‌مجۆره عه‌مه‌لییاتانه كه هه‌تا ئێستا نموونه‌ی هاوشێوه‌شی زۆر بووه، ئه‌فسانه‌ی به‌هێز بوونی سیستمی ئیتلاعاتیی كۆماری ئیسلامی، كه به‌رده‌وام خه‌ڵكی پێ ده‌ترسێنن، ده‌رده‌خات. ئیسماعیل به‌خشی، كرێكاری خه‌باتكاری هه‌فت ته‌په له تویتێكدا له‌مباره‌یه‌وه نووسیی:
“كاتێك هێزه ئیتلاعاتییه ویشیاره‌كان، كه له گوێی خۆمان به ئێمه نزیكترن، به خۆشحاڵی و شانازیه‌وه، له شۆوه‌كانی هه‌واڵدا، منی كرێكاریان وه‌ك سیخوڕی ترامپ و نه‌تانیاهو به خه‌ڵك ده‌ناساند، ده‌بوو شایه‌دی وه‌ها سه‌رشۆڕیه‌كیش بین بۆیان“.
به‌ڵام ئه‌گه‌ر سیستمی زانیاری و ئه‌منییه‌تیی كۆماری ئیسلامی به‌مجۆره بێتوانایه، له به‌رامبه‌ردا، بێشه‌رمیی ئه‌م ڕژیمه، هیچ سنوورێك ناناسێت. له حاڵێكدا كه هاوكات له‌گه‌ڵ كوژرانی مۆحسێن فه‌خری زاده و پاسه‌وانه‌كه‌ی، موحاكه‌مه‌ی دیپلۆماتێكی باڵای ڕژیم، كه له باڵوێزی كۆماری ئیسلامی له ئۆتریش كاری ده‌كرد، له دادگایه‌كدا له وڵاتی بێلژیك، به تاوانی هه‌وڵ دان بۆ بۆمب نانه‌وه له دانیشتنی ڕێكخراوی مۆجاهێدینی خه‌لق له ئارا دابوو، كاربه‌ده‌ستانی كۆماری ئیسلامی باسیان له پێویستیی دادخوازی له ناوه‌نده نێونه‌ته‌وه‌ییه‌كان، له په‌یوه‌ند له‌گه‌ڵ كوژرانی فه‌خری زاده ده‌كرد!
دووهه‌م، به‌ڵام له ڕوانگه‌یه‌كی دیكه‌شه‌وه ده‌كرێ كوژرانی مۆحسێن فه‌خری زاده هه‌ڵسه‌نگێندرێ. له ماوه‌ی یه‌ك حه‌فته‌ی ڕابردوودا، شایه‌دی زنجیره‌یه‌ك ڕووداوین له ڕۆژهه‌ڵاتی ناوه‌ڕاست، كه ئه‌گه‌ر به‌جۆرێك له‌گه‌ڵ یه‌كتر په‌یوه‌ندییان هه‌بێت، نیشانه‌ی ڕووداوێكی گرینگه كه له پشت په‌رده‌وه به‌رنامه‌ی بۆ داده‌ڕێژرێ: كرده‌وه‌ی نائاسایی له‌سه‌ر كار لابردنی وه‌زیری به‌رگریی ئه‌مریكا، له حاڵێكدا كه كه‌متر له دوو مانگی بۆ كۆتایی ده‌وره‌ی سه‌رۆك كۆماری ترامپ ماوه، پێش بینییه‌كانی چاپه‌مه‌نییه پڕ تیراژه‌كانی ئه‌مریكا سه‌باره‌ت به ئه‌گه‌ری هێرشی ئیسرائیل بۆسه‌ر دامه‌زراوه ئه‌تۆمییه‌كانی ئێران، ناردنی بۆمب هاوێژی ب ٥٢ی ئه‌مریكا بۆ ناوچه‌ی ڕۆژهه‌ڵاتی ناوه‌ڕاست، گه‌ڕانه‌وه‌ی ناوی فڕۆكه‌به‌ری ئه‌رته‌شی ئه‌مریكا بۆ كه‌نداو، دیداری نهێنیی و نائاسایی ناتانیاهو، سه‌رۆك وه‌زیرانی ئیسرائیل، له‌گه‌ڵ وه‌لیعه‌هدی عه‌ره‌بستانی سعوودی و وه‌زیری ده‌ره‌وه‌ی ئه‌مریكا له وڵاتی عه‌ره‌بستان، كه ناتانیاهو حاشای لێنه‌كرد، و سه‌ره‌نجام كوژرانی مۆحسێن فه‌خری زاده. له‌م په‌یوه‌نده‌دا، ده‌توانین بڵێین كه ترامپ له مانگه‌كانی كۆتایی ده‌سه‌ڵاته‌كه‌یدا به‌نیازه ده‌وڵه‌تی جۆو بایدێن له به‌رامبه‌ر كۆمه‌ڵێك كرده‌وه‌ی ئه‌نجام دراودا دابنێت كه پاشگه‌ز بوون لێیان بۆ بایدێن دژوار بێت. ئایا هه‌مووی ئه‌وانه ئاڵقه‌ی تێكهه‌ڵكێشراوی زنجیرێك نین كه قه‌راره سیاسه‌تێكی دیاریكراو پێك بێنن؟ بێگومان ئه‌وه پرسیارێكی واقعییه، كه هه‌ڵبه‌ت زانیاریی پێویست بۆ گه‌یشتن به وڵامی بڕاوه، له به‌ر ده‌ست نییه. به‌ڵام به‌و پێناسه‌یه‌ی كه له كۆماری ئیسلامی هه‌مانه، ده‌زانین كه چوونه‌سه‌ره‌وه‌ی گرژییه‌كان و خوڵقانی كه‌ش و هه‌وای جه‌نگی له ناوچه‌كه، ئه‌گه‌ر بۆ خه‌ڵكی ئێران نائه‌منی و هه‌ژاریی زیاتری به‌دواوه ده‌بێ، هه‌ر وه‌ك هه‌میشه، یارمه‌تیده‌ری كۆماری ئیسلامی ده‌بێت تا له‌م ڕێگه‌وه قه‌یرانه ناوخۆییه‌كانی خۆی پێ سووك بكات و درێژه به ده‌سه‌ڵاته‌كه‌ی بدات. له باروودۆخێكدا كه هێزه‌كانی كۆماری ئیسلامی له سووریه له ژێر گوشاری هێرشه‌ی به‌رده‌وامی ئه‌رته‌شی ئیسرائیل دان، له باروودۆخێكدا كه هێشتا ئاسۆی لاچوونی گه‌مارۆكان، پاش هاتنه سه‌ر كاری بایدێن ڕوون نییه، له باروودۆخێكدا كه خه‌ڵك له هه‌ژاری و برسییه‌تی و ته‌ڵه‌فاتی كۆرۆنا وه‌گیان هاتوون و ڕژیم هه‌موو ساتێك چاوه‌ڕوانی هه‌ڵچوونی تووڕه‌یی خه‌ڵكه، له وه‌ها باروودۆخێكدا به‌كرده‌وه ده‌رهێنانی سێناریۆی ئاژاوه‌گێڕانه، بۆ ده‌رباز بوون له‌و گێره‌وكێشانه‌ی كه گرفتاری بووه، دوور له چاوه‌ڕوانی نییه.