ڕۆژی ڕابردوو و لە درێژەی فراوانبوونی شەڕدا، هێرشە مووشەکییەکانی کۆماری ئیسلامی بۆ سەر وڵاتانی ناوچەکە بەرزبوونەتەوە و ئاڵۆزییەکانی کەنداو گەیشتوونەتە ئاستێکی نوێ.
بەپێی دوایین ڕاپۆرتەکان، لە شەپۆلێکی نوێی هێرشەکاندا، ناوچە و بنکە گرنگەکان لە وڵاتانی عەرەبستانی سعوودی و بەحرەین بوونەتە ئامانج، کە بەهۆیەوە زیانی ماددی و ئاگرکەوتنەوە لە هەندێک شوێن تۆمار کراوە، لە کاتێکدا باس لە هێرش بۆ سەر هەندێک بنکەی سەربازیی پەیوەندیدار بە هێزە ئەمریکاییەکانیش دەکرێت. لە هەمان کاتدا، ڕاپۆرتەکان ئاماژە بەوە دەکەن کە لە گەرووی هۆرموزدا هێرش بۆ سەر کەشتییە بازرگانییەکان و هەڕەشەی ڕووبەڕووبوونەوەی هەر جۆرە هاتووچۆیەکی دەریایی زیادیکردووە، کە ئەمە نیگەرانییەکی گەورەی سەبارەت بە ئاسایشی ڕێڕەوی بازرگانی نێودەوڵەتی دروست کردووە.