كۆمه‌ڵێك له كرێكارانی شاره‌داریی لیكه‌ك، ڕۆژی سێشه‌ممه ٢٧ی جۆزه‌ردان، له‌ئاست په‌رداخت نه‌كرانی حه‌قده‌ست و مه‌زایاكانیان، ناڕه‌زایه‌تییان ده‌ربڕی.
كرێكارانی ناڕازیی له‌م پێوه‌نده‌دا ڕایانگه‌یاندووه: كاربه‌ده‌ستانی شاره‌داریی به بیانووی نه‌بوونی سه‌رچاوه‌ی ماڵی، خۆ له په‌رداخت كردنی بڕی ٦ مانگ حه‌قده‌ست و مه‌زایا و هه‌روه‌ها چه‌ندین مانگ حه‌قی بیمه‌ی دواخراوی كرێكاران ده‌بوێرن. كرێكارانی ناڕازیی وێڕای ده‌ربڕینی نیگه‌رانی له ئاست چوونه‌سه‌ره‌وه‌ی دواخرانی حه‌قده‌سته‌كانیان ده‌ڵێن: به‌هۆی په‌رداخت نه‌كرانی حه‌قده‌سته‌كانیان له‌گه‌ڵ كێشه‌وگرفتێكی زۆر له بواری دابین كردنی پێداویستییه‌كانی ژیانی خۆیان و بنه‌ماڵه‌كانیان به‌ره‌وڕوو بوونه‌ته‌وه. ده‌شڵێن: سه‌ره‌ڕای ئه‌وه‌یكه ٧٣ ڕۆژ به‌سه‌ر ده‌ستپێكی ساڵی نوێ تێپه‌ڕده‌بێ، كاربه‌ده‌ستانی شاره‌داریی هه‌تا ئێستا هیچ هه‌نگاوێكیان به ئاڕاسته‌ی په‌رداخت كردنی حه‌قده‌سته‌كانیان هه‌ڵنه‌گرتووه.