ڕۆژی دووشەممە، ٦ی خەرمانان، “عوسمان ئیسماعیلی”، چالاکی کرێکاریی خەڵکی سەقز، لەگەڵ پارێزەرەکەی، “فەرزاد نەسروڵڵاهی”، بەنیسبەت حوکمی سەرەتایی دادگای سه‌قز، ناڕەزایەتییان دەربڕی و داواکارییەکەیان ڕادەستی دیوانی باڵای وڵات کرد.
“عسمان ئیسماعیلی” لەلایەن لقی یەکی دادگای ئینقلابی سەقز بە تۆمەتی “ئەندامەتی لە کۆمەڵە، ڕێکخراوی کوردستانیی حیزبی کۆمۆنیستی ئێران” بە ٣١ مانگ و ١٥ ڕۆژ زیندان و بە تۆمەتی “پڕوپاگەندە دژی نیزام لە ڕێگەی بەشداری لە ڕێوڕەسمی بەخاکسپاردنی ژینا ئەمینی”، بە ٧ مانگ و ١٥ ڕۆژ زیندانی ته‌عزیری مەحکووم کراوە. دادگا بە سەرنجدان بە هۆکارەکانی کەمکردنەوەی سزاکه‌ی لەوانە تەمەنی ناوبراو و خێزانداربوونی، بە سەرنجدان بە یاسای کەمکردنەوەی سزاکانی زیندانی تەعزیری پەسەندکراوی ساڵی ١٣٩٩ و بەپێی ماددەی ٣٧ی یاسای سزای ئیسلامی پەسەندکراوی ساڵی ١٣٩٢، زۆرترین سزا واته ١٦ مانگی بۆ جێبه‌جێ ده‌كات.