کۆمەڵە_رێكخراوی كوردستانی حیزبی كۆمونیستی ئیران
وتاری ڕۆژ

ناسیۆنالیستە توندڕەوە ئێرانیەکان لە دەرەوەی وڵات تۆوی دوو بەرەکی دەچینن

لە حاڵێکدا کە خەڵکی ئێران لە کوردستانەوە تا سیستان و بەلوچستان، لە سنەوە تا تەورێز لە هەموو شوێنێک شان بەشانی یەکتر دروشمی ئازادی و یەکسانی دەڵێنەوە و عەزمیان بۆ دروستکردنی کۆمەڵگایەک کە تێیدا خەبەرێک لە ستەمگەری و دیکتاتۆڕی و پشێلکرانی مافە سەرەتاییەکانی ئینسان نەبێت جەزم کردوە، چەند هەزار کیلۆمیتر لەولاترەوە ناسیۆنالیستە توندڕەوە ئێرانیەکان لە خۆپیشاندانی خیابانی ئێرانیانیەکاندا، کەف دەچڕێنن و لەدژی خەڵکی کوردستان دروشم دەڵێنەوە. لە ماوەی یەک سەدەی ڕابردودا هەردوو نیزامی سەڵتەنەتی و ئیسلامی هەرچیەکیان لەدەست هاتوە، لە خەڵکی کوردستانیان دریغ نەکردوە. لەشکرکێشی نیزامی، میلیتاریزەکردن، ئەمنیەتی کردنی سەرجەم بوارەکانی ژیان، دەستبەسەرکردنی بەرین، ئەشکەنجە و ئێعدام، تیرۆر لە نێوخۆ و دەرەوەی وڵاتدا، هەژارکردنی ئاگاهانە و پلان بۆ داڕێژراو، پێشێلکردنی سەرجەم مافە دیموکراتیکەکانی خەڵک لەوانە مافی سەرەتایی ئاموزش بە زمانی دایکی، کارنامەی حکومەتە سەڵتەنەتیەکان و ئیسلامی بووە.

ئێستا و لە ناخی شۆڕشێکدا کە چەخماخەکەی لە کوردستانی شۆڕشگێڕەوە لێدرا، ئوپوزسیۆنی ڕاستی کۆماری ئیسلامی کە لە دەرەوەی وڵات بە پارە و دۆلاری باد ئاوەردە چەندین تەلەویزیۆن و ڕەسانەیان وەڕێخستوە، ڕاست بە پێچەوانەی ئاڕاستەیەک کە خەڵک لە مەیدانەکانی بەرەنگاربوونەوەیەکی چارەنووس ساز لە نێوخۆی وڵاتدا گرتویانەتە بەر، لە دەرەوەی وڵات تۆوی نەفرەت و دوو بەرەکی دەچێنن. بەشی زۆری ڕاگەیەنەرە فارسی زمانەکانی ژێر کۆنترۆڵی ئەوان بە بانگهێشت کردنی کاربەدەستانی ئەمنیەتی پێشو، بەرپرسانی وەلانراو، یان خانەنشین کراوی هەردوو ڕژیمی پەهلەوی و ئیسلامی، بە دانی میکڕۆفۆن بەدەست هەر مۆرەیەکی گوماناوی و فرەوێژ لە ژێر ناوی پسپۆڕ، کارناس، مامۆستای زانکۆ، چالاک نەتەوەییمەزهەبی، سەڵتەنەت خواز، حەوت ڕۆژی حەفتە هاو جیهەت و هاوئاهەنگ لەگەڵ دەزگا تەبلیغاتیەکانی کۆماری ئیسلامی، خەریکی بڵاوکردنەوەی درۆ و تەبلیغاتی ژاراوین لەدژی خەڵکی کوردستان.

لەم تەبلیغاتە ڕێکخراوانەدا بوونی نەتەوەی جۆرا جۆر لە جوغڕافیای ئێراندا ڕەد دەکەنەوە، زمانی کوردی بۆ لەهجە و زاراوە دادەشکێنن. فەرهەنگ و مێژووی خەڵکی کوردستان ئاوەژوو دەکەنەوە. واتە هەموو ئەو کردەوانەی کە کۆماری ئیسلامی ئەنجامی ئەدات و ئه‌نجامی داوە. ئاشکرایە کە ئەگەر قەرار بێت کەسانی وەک ئەم کۆنەپەرستانە کاربەدەستانی حکومەتی دوای ڕوخانی کۆماری ئیسلامی بن، لە هیچ ڕادەیەک لە جەنایەت و وەحشیگەری وەک ئەوەی کە لە هەردوو ڕژیمی سەڵتەنەتی پەهلەوی و ئیسلامیدا دژبە خەلکی کوردستان ئەنجام دراوە چاوپۆشی ناکەن و بۆ سەرکوتی نەتەوە مافخوازەکان لە ئێراندا ڕوباری خوێن دەخەنەڕێ. بەڵام ئەوەی کە مایەی دڵخۆشی و هیوایە ئەم ڕاستیەیە کە دەنگی ئەم جۆرە ڕەگەزپەرستانە لە نێوخۆی وڵاتدا دەنگدانەوەیەکی نییە و خەڵکی یەکگرتو شان بەشانی یەکتر تا دابینکردنی سەرجەم مافە پێشێلکراوەکانی، تا دابین بوونی ئازادی و یەکسانی، دامەزراندنی یەکێتیەکی دڵخوازانە و ژیانێکی باشتر درێژە بە خەبات و تێکۆشان ئەدات.

  بەرنامەی کۆمەڵە بۆ دامەزراندنی حاکمیەتی جەماوەری کە لەسەر سڕینەوەی هەموو ئاسەوارە کارەساتبارەکانی حکومەتی پاشایەتی و ئیسلامی لە ڕواڵەتی ئەم کۆمەڵگایە جەخت دەکاتەوە و لە بەرنامەی حیزبی کومونیستی ئێرانیشدا لەسەر مافی دیاریکردنی چارەنووسی نەتەوه‌کانی دانیشتوی ئێران و یەکێتی دڵخوازنەیان پێداگری کراوە، بە یەکەوە ژیانی خەڵکی هاوچارەنووس دابین و زەمانەت دەکات. قەبوڵکرانی مافە ئینسانی و دیموکراتیکەکانی خەڵکی کوردستان و باقی نەتەوەکانی دانیشتوی ئێران، بەشداری لە چوارچێوەیەکی ئازاد، یەکسان و سیکۆلار کەم ئازارترین  و ئینسانی ترین ڕێگا چارەیە بۆ ژیانی نەتەوەکانی دانیشتوی ئێران لە پاڵ یەکتردا. تەنیا بە دابین بوونی وەها بارودۆخێکە کە خەڵکی کرێکار و زەحمەتکێش لە کوردستان و سەرجەم ئێران ئیمکانی ئەوەیان دەست دەکەوێ بیر لە دامەزراندنی کۆمەڵگایەکی سۆسیالیستی بکەنەوە کە تێیدا خەبەرێک لە چەوساندنەوە و ستەم بوونی نەبێت.

بابەتی پەیوەندیدار

خواردن و خواردنەوە لە شوێنە گشتییەکان، درێژەی خەباتی مەدەنی

-

ئاگربەستی دەستبەجێی ١٤ ڕۆژە لە غەززە، ئاکامی گوشاری بیروڕای گشتی دژبە شەڕ

-

بۆچی داعش هێشتا زیندووە و تاوان ئەنجام دەدات؟

-

هیوا بە ئازادی لەدەست ستەم و سەرەڕۆیی پەرە دەستێنێ

-

کاریگەریی وێرانکەری هەژاری لەسەر دۆخی تەندروستی و کۆمەڵایەتی و فەرهەنگی چینی کرێکار

-

ڕاگەیاندنی هاوبەشی حیزبی کۆمۆنیستی ئێران و ڕێکخراوی کرێکارانی شۆڕشگێڕی ئێران (ڕاهی کاریگەر)

-