به پێی ڕاپۆرتی ڕێكخراوی مافی مرۆڤی هەنگاو، له ماوه‌ی ڕۆژانی ڕابردوودا هێزه ئه‌منییه‌كانی ڕژیم، پێنج هاووڵاتیی خه‌ڵكی شاره‌كانی مه‌ریوان و “بۆكان”یان ده‌ستبه‌سه‌ر و ڕاپێچی شوێنێكی نادیار كردووه.
به پێی ئه‌م ڕاپۆرته، دوو هاووڵاتیی خەڵکی شاری بۆکان بە ناوەکانی “عوسمان خوداکەرەمی” دانیشتووی گوندی “وەتمیش” و “ئیسماعیل ناهیدە” دانیشتووی گوندی “مەنەچەری” لە لایەن هێزەکانی ئیدارەی ئیتلاعاتی ئەو شارە دەستبەسەر و بۆ شوێنێکی نادیار گوازراونەتەوە. هەتا کاتی ئامادە کردنی ئەم هەواڵە هیچ زانیارییه‌ك له هۆكاری دەستبەسەرکرانی ئەو دوو هاووڵاتییە له‌به‌ر ده‌ستدا نییه. له لایه‌كی دیكه‌وه، سێ هاووڵاتیی خه‌ڵكی شاری مەریوان بە ناوەکانی “حامید دادستان” تەمەن ٥٠ ساڵ، “سۆران دادستان” تەمەن ٢٢ ساڵ و “حەمدی دەبستانی” تەمەن ٤٠ ساڵ خەڵکی گوندی “دەگای شێخان” سەر بە مەریوان، لە لایەن هێزە ئەمنییەتییەکانەوە دەستبەسەر و بۆ شوێنیکی نادیار ڕاگوێزراون. شایانی باسه، بەدواداچوونی بنەماڵەی ئەو سێ هاووڵاتییە بۆ ئاگاداربوون لە چارەنووسی ئەوان هەتا ئێستا بێئاکام ماوه‌ته‌وه.