له ئێستادا، ئیتر هیچ جۆره نهێنكاری و فێڵبازییه‌ك ناتوانێ ئه‌و كاره‌ساته‌ی كه ملیۆنان كه‌س له جه‌ماوه‌ری ئه‌م كۆمه‌ڵگایه‌ی خسووه‌ته ژێر چنگی خۆیه‌وه، بشارێته‌وه. مه‌رگ به‌هۆی نه‌خۆشیی كۆرۆنا، بێكاری، ته‌وه‌رۆمی هاوسارپساو، قاتی و نه‌بوونیی نان و هه‌ر هه‌مووی ئه‌وانه، ئاكامی پتر له چوار ده‌یه ده‌سه‌ڵاتداریه‌تیی ڕژیمێكی سه‌رمایه‌داری ـــ مه‌زهه‌بییه. ئامار و ڕاپۆرته ڕه‌سمییه‌كان ته‌نیا گۆشه‌یه‌ك له فه‌لاكه‌تی ناو ئه‌م كۆمه‌ڵگایه ده‌خه‌نه ڕوو. ئه‌ندامێكی هه‌یئه‌تی زانستیی زانكۆ ده‌ڵێ: “له ساڵی ٩٩ی هه‌تاویدا، زۆرێك له لێكۆڵینه‌وه‌كان ئه‌وه‌مان پێ نیشان ده‌ده‌ن كه هێڵی هه‌ژاری له تاران، گه‌یشتووه‌ته ١٠ ملیۆن كه‌س. هه‌زینه‌ی كرێی ماڵ و خوارده‌مه‌نی، باروودۆخه‌كه‌ی وا لێكردووه كه شایه‌دی كۆچی هێندێك له خه‌ڵكین به‌ره‌و په‌راوێزی شاره‌كان“. هه‌ڵبه‌ت ئه‌م كۆچه وه‌ها پانتاییه‌كی به‌خۆی گرتووه كه جه‌هانگیری جێگری یه‌كه‌می ڕووحانی له ڕۆژی دووشه‌ممه له دانشتنی “شۆرای عه‌شایر و ته‌وسه‌عه‌ی ڕووستایی” دا، باسی له‌وه كرد كه “نزیك به ١١ ملیۆن كه‌س له په‌راوزی شاره‌كان‌دا ده‌ژین“. هه‌ڵبه‌ت له مانگی جۆزه‌ردانی ئه‌مساڵدا ئه‌ندامی “ئه‌نجومه‌نی ئاماده‌كاریی وڵاتی ئێران” له وتووێژ له‌گه‌ڵ هه‌واڵنێریی ئیرنا، وێڕای ئاماژه به چوونه‌سه‌ره‌وه‌ی جه‌معییه‌تی په‌راوێزنشینی ئێران بۆ ٣٨ ملیۆن كه‌س ڕایگه‌یاندبوو كه “٧ ملیۆن و ٦٠٠ هه‌زار كه‌س له ده‌ورووبه‌ری گۆڕستانه‌كان ده‌ژین“. هه‌ر له ماوه‌ی ڕۆژانی ڕابردوودا له میدیاكانه‌وه باسی ئه‌وه كرا كه له هێندێك له ئۆستانه‌كانی ئێران، خه‌ڵك ته‌نیا به دانانی كارتی میللی له لای نانه‌واكان، ده‌توانن نان وه‌رگرن تا به‌ڵكوو هێندێكیان بتوانن له كۆتایی مانگدا، به‌و یارانه یه‌كجار كه‌مه‌ی كه وه‌ریده‌گرن، قه‌رزه‌كه‌یان به نانه‌واكان بده‌نه‌وه. له ٢٣ی مانگی سه‌رماوه‌زدا بۆ جارێكی دیكه بینیمان كه خانه‌نشین كراوان له پتر له ٢٠ شاری ئێران ده‌ستیان دایه كۆبوونه‌وه‌ی ناڕه‌زایه‌تی. ئه‌وان، به درووست، ده‌ڵێن كه به‌و حقوقه‌وه ناتوانن ته‌نانه‌ت هه‌زینه‌ی دوو حه‌فته له ژیانیانی پێ دابین بكه‌ن. ئه‌وان ده‌ڵێن هێندێك له ئێمه ته‌نانه‌ت سه‌ره‌ڕای حقوقی خانه‌نشینی ناچارین كاری ڕۆژمزد ئه‌نجام بده‌ین تا بڕێك له ژانی برسییه‌تی و بێ ده‌وایی خۆمان كه‌م بكه‌ینه‌وه و هه‌ڵبه‌ت به‌هۆی ئه‌وه‌یكه له لایه‌ن به‌رپرسانی ڕژیمه‌وه هیچ وڵامێكیان پێ نه‌درایه‌وه، ڕایانگه‌یاند كه بۆ جارێكی دیكه له ١٤ی مانگی به‌فرانباردا ده‌ست ده‌ده‌نه‌وه كۆبوونه‌وه‌ی ناڕه‌زایه‌تی. ئه‌وان ده‌نگی تێكه‌ڵ له‌گه‌ڵ په‌ژاره و تووڕه‌ییه‌وه هاواریان كرد كه تا كه‌ی ده‌بێ ئه‌م ژیانه فه‌لاكه‌تباره درێژه پێ بده‌ن.
ڕێك له جه‌رگه‌ی ئه‌م باردووخه‌دا و له سه‌روبه‌ندی ڕۆژی په‌ره‌ستاردا، په‌رستارانیش ده‌ستیان دایه ناڕه‌زایه‌تی. ئه‌وان داوایان له جه‌ماوه‌ری ئه‌م كۆمه‌ڵگایه كرد كه له ناڕه‌زایه‌تی به حقوقه دواخراوه‌كانیان كه پتر له یه‌ك ساڵه نه‌دراوه، له ناڕه‌زایه‌تی به له‌خوارێ بوونی كاره‌ساتباری ستاندارده‌كانی په‌یوه‌ندیدار به په‌رستار و نه‌خۆشیی و بێگاری كردن به په‌رستاران، له ناڕه‌زایه‌تی به نه‌بوونی كه‌رسته‌ی ئیمه‌نی له‌وانه ده‌ستكێش و ماسك، ده‌نگ هه‌ڵبڕن. ئه‌وان به‌درووست ده‌ڵێن كه نزیك به یه‌ك ساڵه هه‌موو ڕۆژێ به دیتنی مه‌رگی نه‌خۆشه‌كان، به‌رده‌وام به كابوسی مه‌رگه‌وه، ڕۆژ و شه‌ویان تێده‌په‌ڕێنن. هه‌مووان بینیمان، له‌و كاته‌دا كه ڕژیم، به‌خاتری داماوی و بێتوانایی خۆی خه‌ڵكی به‌ره‌و قه‌تڵگای كۆرۆنا ده‌برد، ئه‌وه كادری ده‌رمانی بوون كه بوێرانه و فیداكارانه، له گیانی خۆیان مایه‌یان دانا. ئه‌وان مافی خۆیانه كه داوا له خه‌ڵك بكه‌ن كه بۆ دیفاع له‌وان و له‌ڕاستیدا بۆ دیفاع له ته‌ندرووستی و سڵامه‌تی، بێنه سه‌ر شه‌قامه‌كان. هاوكات خه‌ڵك ئه‌و ڕاستییه ده‌بینن كه به‌رپرسانی ڕژیم له كاتی بڵاوبوونه‌وه‌ی نه‌خۆشیی كۆرۆناوه، نیشانیان داوه كه ته‌نانه‌ت توانای دابین كردنی سه‌ره‌تاییترین ئیمكاناتی ته‌ندرووستییان بۆ خه‌ڵك نییه. له باروودۆخێكدا كه واكسێنی كۆرۆنا به‌رهه‌م هاتووه و ژماره‌یه‌كی زۆر له وڵاتانی جیهان ده‌ستیان كردووه به كڕینی واكسێن، ڕژیم ته‌نیا درۆ ته‌حویلی خه‌ڵك ده‌دات. هێشتا گاڵته‌جاڕیی نومایشی ده‌زگای ویروسیابی سپای پاسداران له‌بیر خه‌ڵك نه‌چووه‌ته‌وه كه هه‌واڵی تاقی كردنه‌وه‌ی “واكسێنی ئێرانی” له ماوه‌ی ڕۆژانی داهاتوودا، بڵاو ده‌كه‌نه‌وه و واده وبه‌ڵێنیش ده‌ده‌ن كه تا كۆتایی مانگی پووشپه‌ڕ ئه‌م واكسێنه قۆناغی تاقی كردنه‌وه وه‌پشت سه‌ر ده‌نێ و ده‌خرێته ئیختیار خه‌ڵكه‌وه. به‌ڵام خه‌ڵك به ئه‌زموون بۆیان ده‌ركه‌وتووه كه نابێ باوه‌ڕ به ئیدیعاكانی ڕژیم بكه‌ن. به‌تایبه‌ت، خۆیان به ئاشكرا ده‌بینن كه چلۆن به‌رپرسانی ڕژیم سه‌باره‌ت به كڕینی واكسێنی كۆرۆنا له ده‌ره‌وه، خۆڵ ده‌كه‌نه ناو چاوی خه‌ڵكه‌وه و درۆ ده‌كه‌ن.
ئه‌ندامی كۆمیسیۆنی ته‌ندرووستیی مه‌جلیس ده‌ڵێ: “ژماره‌ی واكسێنه‌كان سنوورداره و تا دوو ساڵی دیكه ناگاته ده‌ستی ئێمه”. ئه‌ندامی كۆمیته‌ی كۆرۆنا ده‌ڵێ:”ده‌یفرۆشن به‌ڵام ئێمه پاره‌مان نییه”. سه‌رۆكی كۆمیسیۆنی ته‌ندرووستی مه‌جلیس ده‌ڵێ: “پاره‌مان هه‌یه به‌ڵام بانكی مه‌ركه‌زی ئه‌و پاره‌یه‌مان پێ نادات“. سه‌رۆكی بانكی مه‌ركه‌زیش ده‌ڵێ:”پاره‌مان هه‌یه و بانكی مه‌رگه‌زیش ئه‌و پاره‌یه ده‌دات به‌ڵام ناتوانین بینێرین“. سه‌رۆكی یه‌كیه‌تیی هاورده‌كارانی ده‌رمان ده‌ڵێ:” ده‌توانین پاره بنێرین، هه‌ر ئێستا له ئاستێكی زۆردا ده‌رمان له كۆمپانیه ئه‌مریكایی و ئۆرووپاییه‌كان هاورده‌ی ئێران ده‌كه‌ین و له هه‌مووی ئه‌م موعامه‌لانه‌شدا، پاره ده‌گوازرێته‌وه”. سه‌رۆكی كۆمیته‌ی زانستیی ستادی به‌ره‌نگاربوونه‌وه له‌گه‌ڵ كۆرۆنا ده‌ڵێ:”ڕه‌نگبێ واكسێنه‌كه بفرۆشن و پاره‌شمان هه‌بێ، به‌ڵام فڕۆكه و فریزێری باشمان بۆ هه‌نارده كردنی ئه‌م واكسێنه نییه”. سه‌ره‌نجام جێگری وه‌زیری ڕێگا و شارسازیش ده‌ڵێ: “٥ فڕۆكه‌مان بۆ هاورده كردنی واكسێن ئاماده كردووه و له‌م بواره‌دا كێشه‌مان نییه. خه‌ریكی لێكدانه‌وه‌ین كه له هه‌ركام له‌م فڕۆكانه، چه‌ند تۆن سه‌هۆڵی وشكیان پێویسته تا بتوانین ئه‌م واكسێنه هاورده‌ی ئێران بكه‌ین“. له‌و گاڵته‌جاڕییه‌دا، مه‌علووم نییه كێ ڕاست ده‌كات و كێ درۆ. هه‌ربۆیه به‌ڕاستی خه‌ڵك ڕێگایه‌كیان نییه بێجگه‌له ئه‌وه‌یكه خۆیان چاره‌نووسی خۆیان بگرنه ده‌ست. ملیۆنان كه‌س له خه‌ڵكی ئێران پێویسته هاوئاراسته له‌گه‌ڵ ٣٠ ڕێكخراوی كرێكاری، خوێندكاری، و چالاكانی كۆمه‌ڵایه‌تی كه ڕایانگه‌یاند “واكسێنی گشتی و به‌خۆڕایی، خواستی خێرا و گشتییه”، ڕژیم ناچار بكه‌ن ئه‌م ئه‌ركه به‌جێ بێنێ. هیچ هۆكارێك بوونی نییه كه خه‌ڵك شایه‌دی گیان له‌ده‌ست دانی ئازیزانیان بن و ببنه ته‌ماشاچییانی خامۆشی ئه‌م كاره‌ساته.