به پێی ڕاپۆرته بڵاوكراوه‌كان، سێ بەندکراوی سیاسی خەڵکی ورمێ کە لە بەندی لاوانی زیندانی ناوەندیی ئەو شارە ڕاگیراون، بە نیشانەی دەبڕینی ناڕەزایەتیی بە نادیاربوونی چارەنووسیان دوای یەک ساڵ، مانیان لە خواردن گرتووه.
بەپێی ئه‌م ڕاپۆرته، سێ بەندکراوی سیاسی خەڵکی ورمێ بە ناوەکانی “کەیوان ڕەشۆزادە، کامران قاسمی و ئومید سەعیدی” لە ڕۆژی سێشەممە ٢٠ی گه‌ڵارێزانه‌وه بە نیشانەی دەبڕینی ناڕەزایەتیی بە ١٣ مانگ زیندان و نادیاربوونی چارەنووسیان لە زیندانی ورمێ و هەروەها جیا نکردنەوەی بەندکراوان بە پێی تۆمەتەکان لە بەندی لاوانی ئەو زیندانە، مانیان لەخواردن گرتووه. جێگه‌ی ئاماژه‌یه، ئەو سێ هاووڵاتییە ڕۆژی سێشەممە ١٦ی ڕەزبەری پاره‌كه وێڕای دوو هاووڵاتیی دیکەی خەڵکی ورمێ بە ناوەکانی “عەبدولعەزیز محەممەدپوور” و “نائیب حاجی پوور” لە لایەن هێزەکانی ئیدارەی ئیتلاعاتی ورمێ به تۆمه‌تی “هاوكاری له‌گه‌ڵ یه‌كێك له حیزبه نه‌یاره‌كانی ڕژیم” دەستبەسەر كرابوون، پاش یەک مانگ لێپرسینەوە بۆ زیندانی ناوەندیی ئەو شارە گوازرابوونه‌وه.