كۆمه‌ڵێك له شۆفیر ئۆتۆبووسه‌كانی سازمانی ئۆتۆبووسڕانی ورمێ، ڕۆژی شه‌ممه ٢٩ی سه‌رماوه‌ز، له ناڕه‌زایه‌تیی به كه‌م كردنه‌وه‌ی حه‌قده‌سته‌كانیان، دواخرانی حه‌قی بیمه‌كانیان و وه‌دینه‌هاتنی به‌ڵێنی به‌رپرسان، ده‌ستیان له‌كار كێشایه‌وه و مانیان گرت.
شۆفیرانی ناڕازیی به به‌ڕێوه‌بردنی كۆبوونه‌وه‌یه‌ك له به‌رامبه‌ر بینای شاره‌داری ئۆستانی ئازه‌ربایجانی غه‌ربی، خوازیاری پێڕاگه‌یشتن به سه‌رجه‌م خواسته‌كانیان بوون. ناڕازییان ده‌ڵێن: به‌ده‌ست واده و به‌ڵێنی به‌رپرسان وه‌ته‌نگ هاتوون و بڕیار بوو كه ته‌وه‌ری بیمه‌ی ته‌كمیلی، گه‌ڵاڵه‌ی كاره سه‌خت و زیانباره‌كان، دابین كردنی ڕۆنی ماشین، لاستیك و باقی ته‌سهیلاته‌كان تا كۆتایی ئه‌م مانگه چاره‌سه‌ر بكرێت، به‌ڵام نه‌ته‌نیا ئه‌م كێشانه چاره‌سه‌ر نه‌كراون، به‌ڵكوو له كاتی سه‌ردان بۆ لای به‌رپرسانی ئۆتۆبووسڕانی، به شێوازێكی سه‌رۆكانه قه‌سه‌یان له‌گه‌ڵ كردوون.