ڕۆژی ڕابردوو، گروپی “ئەسحابولکەهف” بەرپرسیارێتی هێرشەکەی شەوی ڕابردووی شاری هەولێری لە ئەستۆ گرت و بانگەشەی کرد کە بەرژەوەندییەکانی ئەمریکایان کردووەتە ئامانج.
بەپێی ڕاگەیاندنێکی ئەو گروپە کە ڕۆژی شەممە بڵاویان کردووەتەوە، هێرشەکە لە ڕێگەی فڕۆکەی بێ فڕۆکەوانەوە ئەنجام دراوە و بە پێی ڕاگەیاندنەکە بەرژەوەندییەکانی “دووژمنی ئەمریکی و داردەستەکانیان” لە هەرێمی کوردستان کراونەتە ئامانج. ئەو گروپە کە خۆی بە ناوی “موقاوەمەی ئیسلامی لە عێراق” ناساندووە و سەر بە کۆماری ئیسلامییە، لە ماوەی چەند ڕۆژی ڕابردوودا بەرپرسیارێتی زۆربەی هێرشەکانی ڕاگەیاندووە کە بۆ سەر هەرێمی کوردستان ئەنجام دراون. بەپێی زانیارییەکان، لە ئەنجامی ئەو هێرشانەی گروپە میلیشیاکان و هێزەکانی کۆماری ئیسلامی تا ئێستا ٦ کەس لە باشووری کوردستان گیانیان بەختکردووە و نزیکەی ٤٠ کەسیش بریندار بوون.