ڕۆژی سێشه‌ممه ٢٧ی جۆزه‌ردان، سه‌ندیكای كرێكارانی نه‌یشه‌كه‌ری هه‌فت ته‌په باسی له كۆبوونه‌وه‌ی نزیكه‌ی ٨٠٠ كه‌س له كرێكارانی ئه‌م كارخانه‌یه له ناڕه‌زایه‌تیی به دواخرانی حه‌قده‌ست و مه‌زایاكانیان كرد.
به پێی ئه‌م ڕاپۆرته، نزیكه‌ی ٨٠٠ كرێكار له به‌شه جۆراوجۆره‌كان به به‌ڕێوه‌بردنی كۆبوونه‌وه له حه‌ساری شیركه‌ت و وتنه‌وه‌ی درووشمی “كرێكاری حه‌وت ته‌په‌ین، برسین ئێمه برسین”، له‌ئاست په‌رداخت نه‌كرانی حه‌قده‌سته دواخراوه‌كانیان و هه‌روه‌ها بیلاته‌كلیفی بارودۆخی كاریان، ناڕه‌زایه‌تییان ده‌ربڕی. كرێكارانی ناڕازیی له دووهه‌مین ڕۆژی به‌رده‌وامی ناڕه‌زایه‌تییه‌كانیان، خوازیاری په‌رداخت كردنی حه‌قده‌ستی مانگی خاكه‌لێوه و گوڵانیان بوون و هه‌روه‌ها خوازیاری درێژ كردنه‌وه‌ی ده‌فته‌رچه بیمه‌كانیان بوون. شایانی باسه، له ئه‌نجامی ئه‌م كۆبوونه‌وه‌یه، كرێكارانی ناڕازیی له‌ئاست ئازادكرانی به‌مه‌رجی “ئۆمید ئه‌سه‌دبه‌یگی” به‌ڕێوه‌به‌ری گشتیی شیركه‌ت و تاوانبار له په‌روه‌نده‌ی گه‌نده‌ڵی ماڵی، ناڕه‌زایه‌تییان ده‌ربڕی.