ڕاپۆرته‌كان له شاری بۆكان باس له‌وه ده‌كه‌ن كه خەڵکی ناڕازیی ئاوایی داشبەند دوای پێکدادانی دوو ماشین و گیان لەدەست دانی ٤ کەس لە جاددەی “بۆکان ــــ میاندوواو”، جاددەکەیان بە نیشانەی ناڕەزایەتی بەستووه.
بە پێی ئه‌م ڕاپۆرته، دوانیوەڕۆی ڕۆژی چوارشەممە و دوابه‌دوای پێکدادانی ماشینێکی سه‌واری له‌گه‌ڵ بارهەڵگرێک لە جاددەی “بۆکان ــــ میاندوواو” کە به‌هۆیه‌وه ٤ ئه‌ندامی بنه‌ماڵه‌یه‌ك گیانیان لەدەستدا، خەڵکی ناڕازی له‌ئاست کەمتەرخەمی بەرپرسانی ڕژیم و خراپی ڕێگاوبانەکان جاددەی سەرەکی “بۆکان ــــ میاندوواو”یان بەست و ڕێگایان نەدا ماشینەکان بەو ڕێگایەدا بڕۆن. شایانی باسە، هەتا ئامادە کردنی ئەم هەواڵە هیچ بەرپرسێکی کە پێشتر بەڵێنی گەڵاڵەی گەورەکردن و بە ستاندارد کردنی جاددەکە واتە بە ئوتووبان کردنیان دابوو ڕژیم بۆ وڵامدانەوە به خه‌ڵكی ناڕازیی ئامادە نەبووە. جێگه‌ی ئاماژه‌یه، سەرلە بەیانی ڕۆژی چوارشەممە، لە ڕێگەی “بۆکان ــــ میاندوواو” و لە نێوان ئاوایی داشبەند و مەڵڵالەر، بە هۆی پێکدادانی کامیۆنێک و ماشینێکی سه‌واری، ٤ ئه‌ندامی بنه‌ماڵه‌یه‌ك بە ناوەکانی “کەیوان ڕەسووڵ‌پوور” و هاوژینەکەی “فاتمە” و هەروەها دوو لە منداڵەکانیان بە ناوەکانی “سۆهەیل و سەمیرا” گیانیان لە دەست دا و شۆفێری ماشینەکەش بە سەختی بریندار بووە.