كۆمه‌ڵێك له فێركارانی نێهزه‌تی سه‌وادئاموزی، ڕۆژی سێشه‌ممه ٢٧ی جۆزه‌ردان، له ناڕه‌زایه‌تیی به دیاری كردنی هه‌ندێ خاڵ له بارودۆخی دامه‌زراندنیان و چوونیان بۆ زانكۆی فه‌رهه‌نگیان، له به‌رامبه‌ر بینای مه‌جلیسی ڕژیم ده‌ستیاندایه كۆبوونه‌وه.
ناڕازییان وێڕای ئاماژه به‌وه‌یكه پێشتر چه‌ندین كۆبوونه‌وه‌ی هاوشێوه‌یان له به‌رامبه‌ر مه‌جلیس و شوێنه‌كانی دیكه به‌ڕێوه‌بردووه، ڕایانگه‌یاندووه: له‌و كاتدا ژماره‌یه‌ك له نوێنه‌رانی مه‌جلیس و به‌ڕێوه‌به‌رانی ناوه‌نده‌كانی ده‌وڵه‌تی، به‌ڵێنیان دابوو كه په‌یگیری خواسته‌كانیان ده‌بن، به‌ڵام ئێستا به‌دوای تێپه‌ڕبوونی چه‌ند ساڵ، هێشتا ئه‌م به‌ڵێنانه به‌كرده‌وه ده‌رنه‌هاتوون. ناڕازییان كه خوازیاری هه‌ڵوه‌شاندنه‌وه‌ی ئازموونی دامه‌زراندن له زانكۆی فه‌رهه‌نگیانن، ده‌ڵێن: داوایان لێ كراوه كه بۆ درێژه‌ی هاوكاری له‌گه‌ڵیان له‌م ئازموونه‌دا به‌شداری بكه‌ن و له ئه‌گه‌ری قه‌بووڵ نه‌كردنی ئه‌م داواكارییه، ده‌بێ كۆتایی به هاوكاریان له‌گه‌ڵ ئاموزش و په‌روه‌رش بێنن.