به‌پێی هه‌واڵی گه‌یشتوو، ڕۆژی یه‌كشه‌ممه ١٦ی به‌فرانبار، كۆمه‌ڵێك له ژنانی تێكۆشه‌ری شاری سنه له‌به‌رده‌م ماڵی غه‌زاڵه حدوودی كه چه‌ند ڕۆژ له‌مه‌وبه‌ر له‌لایه‌ن داواكاره‌كه‌یه‌وه كوژرا كۆبوونه‌وه و توندووتیژی دژ به ژنانیان مه‌حكووم كرد.
ژنانی به‌شدار له‌و كۆبوونه‌وه له په‌یامێك دا ڕایانگه‌یاند: ژنكوژی ته‌نیا قه‌تڵی ژنان نییه به‌ڵكوو كاریگه‌ری سه‌خت له‌سه‌ر بنه‌ماڵه‌كان و كۆمه‌ڵگا داده‌نێت. ژنانی ناڕازی له كۆتایی كۆبوونه‌وه‌كه‌یاندا خوازیاری پێدانی زانیاری زۆرتر به كۆمه‌ڵگا و درووستكردنی میكانیزمێك بۆ پێشگیری له توندووتیژی دژ به ژنان بوون. شایانی باسه كه غه‌زاڵه حدوودی ته‌مه‌ن ٢٧ ساڵ و خه‌ڵكی یه‌كێك له گونده‌كانی قوروه، كاتێك وڵامی نای به داواكاره‌كه‌ی دا له شوێنی كاره‌كه‌ی له‌لایه‌ن بكۆژه‌وه سووتێندرا و پاش چه‌ند ڕۆژ به‌سته‌ری بوون له نه‌خۆشخانه گیانی له‌ده‌ست دا.