ڕۆژی چوارشه‌ممه ٨ی خاكه‌لێوه، بۆمبێك له شاری كۆبانی ته‌قییه‌وه و به‌هۆیه‌وه چه‌ند كه‌س بریندار بوون و له شاری ڕه‌قه، چه‌كدارانی داعش هێرشیان كرده سه‌ر هێزه‌كانی سووریای دیمۆكراتیك و دوو ئه‌ندامی قه‌سه‌ده گیانیان به‌خت كرد.
به‌پێی زانیارییه‌كان، ڕۆژی ڕابردوو، ئۆتۆمبێلێكی بۆمبڕێژكراو له یه‌كێك له گه‌ڕه‌كه‌كانی كۆبانی ته‌قیوه‌ته‌وه و به‌وهۆیه‌وه چه‌ند كه‌س به‌سه‌ختی بریندار و ڕه‌وانه‌ی نه‌خۆشخانه كراون. له شاری ڕه‌قه، چه‌كدارانی داعش هێرشیان كردۆته سه‌ر بازگه‌یه‌كی پشكنین و شه‌ڕ و پێكدادان هاتۆته ئاراوه. له ئاكامی ئه‌و هێرشه‌دا دوو هێزی سووریای دیمۆكراتیك گیانیان به‌خت كردووه و چه‌كدارێكی داعش كوژراوه و چه‌كدارێكی دیكه دستبه‌سه‌ر و گه‌ڕان به‌دوای تیرۆریستانی دیكه‌ی ئه‌و گرووپه به‌رده‌وامه.