هه‌ڵسووكه‌وتی وه‌حشیانه‌ی هێزه‌كانی حه‌راسه‌تی زانكۆی ئازادی تاران و هێزه ئه‌منیه‌تیه‌كان له كاتی ڕفاندنی ئاهوو ده‌ریایی و گواستنه‌وه‌ی بۆ نه‌خۆشخانه‌ی ده‌روونی، شه‌پۆلێك له كاردانه‌وه‌ی توندی له نێوخۆ و ده‌ره‌وه‌ی وڵات به‌دوای خۆی دا هێنا و ڕاپۆرتێری نه‌ته‌وه‌یه‌كگرتووه‌كان، مای ساتۆ خوازیاری ئازادی بێ شه‌رت و مه‌رجی بوو.
به‌دوای ڕفاندنی ئاهوو ده‌ریایی، گه‌وهه‌ر عشقی داكی نه‌مر، سه‌تار به‌هه‌شتی، كه‌تایۆن ڕیاحی ئه‌كته‌ری سینه‌ما، مێهدی یه‌راحی گۆرانیبێژ، ده‌یان پارێزه‌ری سه‌ربه‌خۆی دادگوسته‌ری، نوێنه‌رانی پاڕله‌مان له ئاڵمان و فه‌ڕانسه، دكتۆر حه‌سه‌ن باقری نیا مامۆستاری له‌سه‌ركار ده‌ركراوی زانكۆی مه‌شهه‌د و نه‌رگس محه‌ممه‌دی براوه‌ی خه‌ڵاتی ئاشتی نۆبێل له چه‌ند په‌یامی جیاجیا دا وێڕای ئیدانه‌كردنی سه‌ركوتی ژنان له‌لایه‌ن كۆماری ئیسلامی، خوازیاری ئازادی ئاهوو و كۆتایی هێنان به سه‌ركوتی ژنان له ئێران بوون.