به پێی ڕاپۆرته‌كان، درەنگانێکی شەوی چوارشه‌ممه ١٥ی خه‌زه‌ڵوه‌ر، لە هێرشێکدا بۆسەر كرێكارانی کۆمپانیایەکی كانادایی لە بوکرینا فاسۆ، له رۆژئاوای ئەفریقا ٣٧ كرێكار کوژران و ٦٠ کەسی دیکەش برینداربوون.
کرێکارەکان لەنێو پێنج ئۆتوبووس دا لە نزیک شارۆچکەی “بۆنغو” بوون و ویستوویانە بچنە سەر کارەکەیان، کەوتوونەتە نێو بۆسەی گرووپێکی چەکدار، گرووپەکە سەرەتا لەڕێگەی تەقاندنەوەی بۆمبێک کاروانه‌كه‌یان وەستاندووە و دواتر دەستڕێژی گولـلەیان لە کرێکارەکان کردووە. شایانی باسه، کرێکارەکان بۆ کۆمپانیای “سیمافۆی” كانادایی كارده‌كه‌ن کە کاری سەرەکی دەرهێنانی زێڕ لە ناوچەکەیه. جێگه‌ی ئاماژه‌یه، تا ئێستا هیچ گرووپ و لایەنێک بەرپرسیارییەتی خۆی لە ئەنجامدانی هێرشەکە ئەنجامنەداوە، بەڵام له مانگه‌كانی رابردوودا ژمارەیه‌ك چه‌كداری سه‌ر به گرووپی ئیسلامی داعش ڕویان كردووته ناوچه‌كه و گوماندەکرێت هێرشەکە لەلایەن ئەوانه‌وه ئەنجامدرابێت. له‌و ماوه‌یه‌دا هه‌زاران كه‌س له خه‌لكی ناوچه‌كه ناچار بوون له ترسی ئه‌و گرووپه شوێنه‌كانی خۆیان به جێ بێڵن.