ڕۆژی چوارشه‌ممه ٢ی خه‌زه‌ڵوه‌ر ١٤٠٣، ئه‌رته‌شی ئیسرائیل هێرشێكی به‌رینی كرده سه‌ر بنكه‌ی میلیشیاكانی سه‌ر به كۆماری ئیسلامی له لوبنان، غه‌زه و سووریه و له ئه‌نجامی ئه‌و هێرشانه‌دا، به ده‌یان كه‌س بوونه قوربانی.
به پێی ڕاپۆرته‌كان، له ئه‌نجامی هێرشی ئاسمانی ئیسرائیل بۆ سه‌ر باشووری لوبنان، به‌لانیكه‌م ١٠ كه‌س كوژران و زیاتر له ٣٠ كه‌سی دیكه‌ش بریندار بوون، هاوكات ٤٢ كه‌س به‌هۆی بۆردوومانی چه‌ند ناوچه له غه‌زه گیانیان له‌ده‌ست داوه و به ده‌یانی كه‌سی دیكه‌ش بریندار بوون. به پێی ڕاپۆرتی ڕوانگه‌ی سووری بۆ مافه‌كانی مرۆڤ، ناوچه‌ی كه‌فه‌ر سووسه‌ی دیمه‌شق له‌لایه‌ن فڕۆكه‌كانی ئیسڕائیله‌وه بۆردوومان كراوه و به‌وهۆیه‌وه چه‌ندین كه‌س بوونه‌ته قوربانی. شایانی باسه كه ده‌زگای هه‌واڵنێری ئه‌لعه‌ره‌بییه‌ش باسی له هێرشی به‌هێزی ئه‌مریكا و به‌ریتانیا بۆ سه‌ر كۆگای چه‌ك و ته‌قه‌مه‌نی حووسییه‌كانی یه‌مه‌ن كردووه.