ڕاپۆرته‌كان باس له‌وه ده‌كه‌ن كه له ئه‌نجامی دوو هێرشی خوێناوی له ویلایه‌ته‌كانی “خوست” و “وه‌رده‌ك”ی ئه‌فغانستان، لانیكه‌م ٣٢ كه‌س گیانیان له‌ده‌ستداوه و به ده‌یان كه‌سی دیكه‌ش برینداربوون.
وه‌زاره‌تی ناوخۆی ئه‌فغانستان ڕایگه‌یاندووه، هێرشبه‌ره‌كان سه‌رله به‌یانی ڕۆژی سێشه‌ممه به ئۆتۆمبێلێكی بۆمبڕێژكراوه‌وه، هێرشیان كردووه سه‌ر بنكه‌یه‌كی هێزه تایبه‌ته‌كانی پۆلیس و به‌هۆیه‌وه ٢٧ كه‌س له‌وانه ٩ كه‌سی مه‌ده‌نی گیانیان له‌ده‌ستداوه. هه‌روه‌ها وه‌ته‌بێژی پارێزگای وه‌رده‌ك ڕایگه‌یاندووه كه به‌هۆی نانه‌وه‌ی دوو بۆمب له شوێنه جیاجیاكانی شاره‌كانی “جلریز و چك”، ٥ كه‌سی مه‌ده‌نی گیانیان له‌ده‌ستداوه. شایانی باسه، به‌دوای ده‌ستپێكی وتووێژه‌كانی ئاشتی له نێوان ده‌وڵه‌تی ئه‌فغانستان و تاڵبان، ئه‌م وڵاته شایه‌تی شه‌پۆلێكی نوێ له توندووتیژییه‌كان بووه‌ته‌وه. جێگه‌ی ئاماژه‌یه، ئه‌م وتووێژانه ماوه‌ی زیاتر له ٤٠ ڕۆژه له شاری “دۆحه”ی قه‌ته‌ر له ئارادایه، به‌ڵام هه‌تا ئێستا هیچ ده‌رئه‌نجامێكی نه‌بووه.