هاوکات لەگەڵ بەردەوامبوونی ناڕەزایەتیی خوێندکارانی قوتابخانە و مانگرتنی بەشێک لە خزمەتگوزارییە گشتی و پیشەسازییەکان لە فەڕەنسا، یەکێتییە کرێکارییەکان پشتیوانییان لە داخوازییەکانی خوێندکاران کرد و خوازیاری زیادکردنی حەقدەست، بەهێزکردنی خزمەتگوزارییە گشتییەکان و ڕووبەڕووبوونەوەی گوشارەکانی تێچووی ژیانیان بوون.
بەپێی دوایین ڕاپۆرتەکان، ناڕەزایەتیی قوتابیانی قوتابخانەی ئامادەیی لە چەندین شاردا بەردەوام بووە و ناڕازیان دژ بە کەمیی مامۆستا، زۆریی ژمارەی قوتابیان لە پۆلەکان و بارودۆخی نالەباری هەندێک قوتابخانە هاتوونەتە سەر شەقام. لە هەمان کاتدا، کرێکارانی بەشی چاودێریی منداڵان و کارمەندانی کۆمپانیای نەوتی تۆتال ئەنێرژیی، دەستیان لە کارەکانیان کێشاوەتەوە و مانیان گرتووە. شایانی باسە کە کۆنفیدراسیۆنی گشتیی کرێکاران پشتیوانیی لە ناڕەزایەتیی خوێندکاران کردووە و داوای لە کرێکاران کردووە خۆیان بۆ مانگرتنێکی فراوانتر لە پێنجی نۆڤەمبەردا ئامادە بکەن.