شەوی شه‌ممه له‌سه‌ر یه‌كشه‌ممه، خۆپیشاندەرانی عێراق بارەگای چەند حیزبێک له‌وانه حیزبی “ده‌عوه‌ی”یان سوتاند.
میدیاکانی عێراق بڵاویانکردووه‌ته‌وه، خۆپیشاندەران لە پارێزگای واست بارەگایەکی رێکخراوی بەدر و بارەگایەکی حیزبی دەعوە و ماڵی جێگری سەرۆکی لیستی عەسائیب ئەهلی حەق (سادیقون)یان سووتاند. لەلایەکی دیکەوە، خۆپیشاندەران رایانگەیاندووە، له ڕۆژی یەکشەممەوە دەست بە خۆپیشاندانەکانیان لە مەیدانی تەحریری بەغدا و لە شارەکانی بابل، واست، ناسریە، بەسرە و کەربەلا دەکەنەوە. جێگه‌ی ئاماژه‌یه، رۆژی ٧ی مانگی مه‌ی، مستەفا کازمی، بە سەرۆک وەزیرانی نوێی عێراق هەڵبژێردرا و بەڵێنی دا کە دەست بۆ کۆمەڵێک چاکسازیی ببات و بکوژانی خۆپیشاندەران بە سزا بگەیەنێت، بەڵام خۆپیشاندەران هەر سێ رۆژ دوای دەستبەکاربوونی ناوبراو، دەستیان بە خۆپیشاندان کردەوە.