به پێی ڕاپۆرته‌كان، چوار چالاکی مەدەنیی بە ناوەکانی “ئیرج ڕەحیم‌زادە، فەردین کەریمی، ئارمین ئەسپرلووس و ئارمان وەفایی” لەلایەن لقی یەکی دادگای ڕژیم له شاری سنە، هەر کامەیان بە سێ مانگ و ١ ڕۆژ زیندان مەحکووم کراون و “ئەفشین شێخ‌ئیسلامی وه‌ته‌نی”ش بە مانگێک زیندانی مەحکووم کراوە.
به پێی ئه‌م ڕاپۆرته، ئەو ٥ چالاکە مەدەنییە بە تۆمەتی “پڕۆپاگەندە دژی نیزام”، “کۆبوونەوە و تەبانی بە مەبەستی تێکدانی ئەمنییەتی میللی” و “ئەندامبوون لە یەکێک لە حیزبە نه‌یاره‌كانی ڕژیم” تاوانبار کراون. جێگه‌ی ئاماژه‌یه، ئەفشین شێخ ئیسلامی‌وەتەنی، ڕۆژی یەکشەممە ٢٨ی بەفرانباری ٩٧ لە شاری سنە لە لایەن هێزە ئه‌منییه‌کانەوە دەستبەسەر و پاش مانگ بە دانانی وه‌سیقه‌ی ٥٠٠ میلیۆن تمەنی ئازاد کرابوو. هه‌روه‌ها ڕۆژی یەکشەممە ٢٨ی بەفرانباری٩٧، ئیرج ڕەحیم‌زادە، لەلایەن هێزە ئه‌منییه‌کان لە شاری مەریوان ده‌ستبه‌سه‌ر و پاش تەواوبوونی لێپرسینەوەکەی، سەرەتای مانگی ڕەشەممەی هەمان ساڵ بە دانانی وه‌سیقه له زیندان ئازاد کرابوو. ڕۆژی دووشەممە ٢٩ی بەفرانباری ساڵی ٩٧ش، فەردین کەریمی و ئارمین ئەسپرلووس، لە شاری سنە لەلایەن هێزە ئه‌منییه‌کانی سپای پاسدارانەوە ده‌ستبه‌سه‌ر و دواتر بۆ لێپرسینەوە ڕەوانەی گرتووخانه‌ی ئەو ئیدارەیە کرابوو. له لایه‌كی دیكه‌وه ئارمان وەفایی ٢٨ی سەرماوەزی ساڵی ٩٧، لە لایەن هێزە ئه‌منییه‌کانی ئیدارەی ئیتلاعاتی سنە ده‌ستبه‌سه‌ر و پاش سێ مانگ بە دانانی وه‌سیقه و بە شێوەی کاتی ئازاد کرابوو.