شه‌وی شه‌ممه ٢٣ی مانگی ڕه‌زبه‌ر، خه‌ڵكی ناڕازی له شاره جۆراوجۆره‌كانی ئێران دژبه سه‌ركوتگه‌ریه‌كانی كۆماری ئیسلامی ڕژانه سه‌ر شه‌قام و له‌گه‌ڵ هێزه‌كانی ڕژیم به‌ره‌وڕوو بوونه‌وه.
ڕۆژی شه‌ممه ڕژیمی سه‌ركوتگه‌ر كۆماری ئیسلامی هه‌ر له به‌یانیه‌وه ئینترنێتی داخست و كه‌ش و هه‌وای ئه‌منی به‌سه‌ر شاره‌كاندا زاڵ كرد، به‌ڵام وێڕای ئه‌و باروودۆخه ئه‌منییه‌تییه خه‌ڵكی ناڕازی له‌شاری ئه‌رده‌ربیل ڕژانه سه‌ر شه‌قام و له‌گه‌ڵ هێزه‌كانی ڕژدیم به‌شه‌ڕ هاتن، له شاره‌كانی ڕۆژهه‌ڵاتی كوردستان له‌وانه، مهاباد و بۆكان شه‌ڕی قورس له نێوان خه‌ڵكی ناڕازی و هێزه‌كانی ڕژیم هاته ئاراوه و به‌پێی سه‌رچاوه خۆجێیه‌كان سێ كه‌س له هێزه‌كانی سپای پاسداران كوژران و برینداربوون و چه‌ندین لاوی شۆڕشگێڕیش له شاری مهاباد به ته‌قه‌ی ڕاسته‌وخۆی هێزه‌كانی ڕژیم برینداربوون، له شاری سه‌قز و مه‌ریوان تا درنگانی شه‌و شه‌ڕ و پێكدادان له نێوان خه‌ڵكی ناڕازی و سپای پاسداران به‌رده‌وام بوو، له شاری كرماشان هێزه‌كانی ڕژیم هێرشیان كرده سه‌ر خه‌ڵكی ناڕازی و ده‌ستڕێژی گولله‌یان له خه‌ڵك كرد و له‌وێش چه‌ند كه‌س برینداربوون، له شاری ئه‌راك و به‌نده‌رعه‌باس كۆبوونه‌وه‌ی گه‌وره دژبه به‌رپرسانی ڕژیم به‌ڕێوه‌چوو، له‌شاری ته‌ورێز ناوه‌ندی شار له گونتڕۆڵی لاوانی شۆڕشگێڕ دا بوو، له‌شاره‌كانی كرمان و یه‌زد خه‌ڵكی ناڕازی تا دره‌نگانی شه‌و شه‌قامه‌كانیان داخست و ڕێگه‌یان نه‌دا هێزه‌كانی ڕژیم به ئاسایی هاتووچۆ بكه‌ن، له چه‌ند گه‌ڕه‌كی شاری تاران تێكهه‌ڵچوونی قورس له نێوان هێزه‌كانی ڕژیم و لاوانی بوێری ئه‌و شاره ڕوویدا و له دوورگه‌ی كیش خه‌ڵكی ئازادیخواز كۆبوونه‌وه‌ی گه‌وره‌یان به‌ڕێوه‌برد و دژبه عه‌لی خامنه‌یی دروشمیان وته‌وه.