كۆمسیۆنى مافەکانى مرۆڤى عێراق له دوایین ئاماریدا ڕایگه‌یاندووه كه ژماره‌ی قوربانیانى خۆپیشاندانەکانى عێراقى لەسەرەتاى مانگی ئۆکتۆبەرەوە گه‌یشتووه‌ته ٥٤٣ کەس و نزیکەى ٣٠ هەزار کەسیش برینداربوون.
کۆمسیۆنى مافەکانى مرۆڤى عێراق لە بەیاننامەیەکدا رایگەیاند، ٢٧٦ کەسیان لە شاری بەغدای پایتەخت کوژراون. بەپێى ئه‌م بەیاننامەیه، ٢٢ چالاکوانى مەدەنى “تیرۆرکراون”، ٧٢ کەسى دیکە بێسەروشوێنن و رفێنراون، ٢٧٠٠ پرۆسەى راگرتن رووبەڕووى چالاکوانان بووه‌تەوە و تا ئێستاش ٣٢٨ کەس راگیراون و بەرنەدراون. جێگه‌ی ئاماژه‌یه، لە سەرەتاى مانگى ئۆکتۆبەرى ساڵى رابردووەوە، دژى نەبوونى خزمەتگوزارى و بێکارى و نەبوونى هەلى کار، خۆپیشاندانى بەرفراوان لە شارەکانى ناوەراست و باشورى عێراق روویدا، کە دواتر داواکاریی خۆپیشاندەران بۆ گۆڕینى دەسەڵاتدارانى عێراق گۆڕدرا و سەرەڕاى دەستلەکارکیشانەوەى عادل عەبدولمەهدى و راسپاردنى محەمەد تۆفیق عەلاوى بۆ پێکهێنانى کابینەى نوێى حکومەت تا ئێستاش بەردەوامە.