به‌پێی ڕاپۆرتی ڕێكخراوی مافی مرۆڤی هەنگاو، هێزە ئەمنییەکانی ڕژیم لە گوندی سلێن سەربە شاری سەوڵاوا، هاووڵاتییەکی خەڵکی ئەو گوندەیان دەستبەسەر و بۆ شوێنێکی نادیاریان گواستەوە.
بە پێی ئه‌م ڕاپۆرته، سەرلەبەیانی ڕۆژی یەکشەممە ١٤ی مانگی گوڵان، هێزەکانی ئیدارەی ئیتلاعاتی شاری سەوڵاوا هەڵیانکووتاوەتە سەر ماڵی “عەبدووڵڵا ئەدوایی” لە گوندی سلێن و دەستبسەریان کردووە. شایانی باسه، هێزەکانی ئیدارەی ئیتلاعات درگا و شیشەی ماڵی ئەو هاووڵاتییەیان شکاندووە و عەبدووڵڵا ئەدواییان بە تۆمەتی “هاوکاری لەگەڵ یه‌كێك له حیزبه نه‌یاره‌كانی ڕژیم” دەستبەسەر کردووە. جێگه‌ی ئاماژه‌یه، “عەبدووڵا ئەدوایی” زستانی ساڵی ٩٧ لەگەڵ پێنج کەسی دیکەی خەڵکی ئاوایی سەلین دەستبەسەر و هاوینی ساڵی دواتر لە لایەن دادگای ڕژیم له شاری مەریوان بە تۆمەتی “هاوکاری لەگەڵ یه‌كێك له حیزبه نه‌یاره‌كانی ڕژیم” حوکمی یەک ساڵ بەندکرانی بەسەردا سەپێندرابوو.