شه‌وی دووشه‌ممه ٤ی خاكه‌لێوه‌ی ١٤٠٤، ده‌یان هه‌زار كه‌س له خه‌ڵكی توركیا له چه‌ندین شاری ئه‌و وڵاته بۆ شه‌شه‌مین شه‌وی به‌رده‌وام دژ به ده‌وڵه‌تی ئه‌ردۆغان خۆپێشاندانیان كرد و به ده‌یان كه‌سی دیكه له‌لایه‌ن پۆلیسه‌وه ده‌ستبه‌سه‌ر كران.
ماوه‌ی شه‌ش ڕۆژه خه‌ڵكی توركیا دژ به زیندانیكردنی ئه‌كره‌م ئیمام ئۆغڵۆ خۆپێشاندان ده‌كه‌ن و له‌و ماوه‌یه‌دا زیاتر له هه‌زار و ١٣٣ كه‌س له‌لایه‌ن پۆلیسه‌وه ده‌ستبه‌سه‌ر كراون. ڕۆژی ڕابردوو ئه‌ردۆغان هه‌ڕه‌شه‌ی له خۆپێشانده‌ران و ڕێبه‌رانی حیزبی كۆماریخوازانی گه‌ل كرد و ڕایگه‌یاند: به هۆی ڕووداوه‌كانی شه‌ش ڕۆژی ڕابردوو زیانێكی زۆر به وڵات گه‌یشتووه و هه‌مووی له ئه‌ستۆ ڕێبه‌رانی ئه‌و حیزبه‌یه. شایانی باسه كه له نێو ده‌ستبه‌سه‌ركراوان دا ده ڕۆژنامه‌وان بوونیان هه‌یه و یه‌كێتی ئورووپا داوای له ده‌وڵه‌تی توركیا كردووه به زوورترین كات ئازادیان بكات.