فەرماندەیەکى هەسەدە رایگه‌یاندووه كه ڕۆژی پێنجشه‌ممه ٢ی خه‌زه‌ڵوه‌ر، سپاى تورکییه و گرووپە توندڕەوەکان هێرشیان کردوەتە سەر رۆژهەڵاتى شاری سەرێ کانى.
سەربارى واژۆ کردنى دو رێککەوتن لەگەڵ ئه‌مریکا و روسییه، سپاى تورکییه و چەکدارانى سەر بەو وڵاتە بەردەوامن لە هێرشى سەربازیى بۆ سەر رۆژهەڵاتی سەرێ کانى. “مەسعود سحۆ”، نوێنەری کانتۆنەکانى رۆژئاوا لەهەرێمی کوردستان، ڕایگه‌یاند كه هێزه داگیركه‌ره‌كانی تورکییه لە رۆژهەڵاتی سەرێ کانی دەسوڕێتەوە و به‌نیازن مه‌ودای ناوچەی ئارام فراوان بکه‌نه‌وه و تەجاوزی رێککەوتنەکەی لەگەڵ ئەمریکا و سورییه بکه‌ن. ئەوە لەکاتێکدایە لە چەند رۆژى رابردودا هەسەدە پابەندى ئەو ئاگربەست و رێککەوتنانە بووه كه لەلایەن ئەمریکا و روسییه‌وە له‌گه‌ڵ توركییه كراون، بەڵام فەرماندەکانى هەسەدە جەخت له‌سه‌ر ئه‌وه دەکەنەوە کە تورکییه خۆى پابەند به ئاگربه‌ست نابینێت ، و هه‌روه‌ها مەزڵوم عەبدى فەرماندەى گشتى هەسەدە لە یەکەم تویتیدا رایگەیاندووه كه تورکییه بەردەوامە لە پێشێلکاری ئاگربەست و هێرش بۆ سەر رۆژهەڵاتى سەرێ کانى.